Shoqata e të Burgosurve Politikë e Kosovës

Jo agresionit elektoral të Serbisë në Kosovë

· SHBPK i kupton si të drejta dhe të natyrshme format e ndryshme të reagimeve dhe protestave kundër agresionit zgjedhor të Beogradit në Kosovë. Shoqata solidarizohet me protestën e iniciuar nga lëvizja “Vetvendosje” dhe shpreh besimin se ajo do të jetë reagim i fuqishëm, por i qetë, i  pjekur dhe demokratik.

Shkruan: Hydajet HYSENI

Prishtinë, 09. 05. 2008

Shoqata e Ish të Burgosurve Politikë ka tërhequr me kohe dhe më se një herë vërejtjen për pasojat e rrezikshme që mbartte në vete politika e tërheqjeve dhe koncesioneve të njëpasnjëshme ndaj strategjive obstruksioniste e revanshiste të Beogradit, që ndiqte në vijimësi prania ndërkombëtare në Kosove e madje edhe qarqe në udhëheqjen kosovare, politikë kjo që erdhi dhe u mishëruar e u ngurtësua në të ashtuquajturën dokument i Ahtisarit, në të ashtuquajturën pako e ligjeve të Ahtisarit e madje edhe në Kushtetutën e Republikës së Kosovës. Ajo që po ndodh tani me zgjedhjet e Serbisë në Kosovën e shpallur dhe pjesërisht të njohur shtet i pavarur e sovran, dëshmon se, për fat të keq, ky parashikim i Shoqatës (dhe jo vetëm asaj) po dëshmohet katërçipërisht dhe në mënyrë alarmuese, siç po dëshmon sa e gabuar dhe me rreziqe mund të jetë qasja injoruese e nënvleftësuese ndaj revanshizmit serbomadh, prirja për ndarjen e tij në demokratike e radikale ose prirja për trajtim të ndryshëm të pretendimeve të tij për zgjedhje lokale nga ato qendrore serbe(!?).

Kosova dhe shteti i saj i saposhpallur po i ekspozohet pos tjerash edhe një agresioni tejet të rrezikshëm politikoelektoral, me pasoja  të rënda imediate e me rreziqe pasojash edhe më të rënda afatgjata politike e shoqërore. Kreu revanshist i Beogradit jo vetëm qe nuk njeh realitetin e ri në Kosovën e pavarur, por duke shfrytëzuar amullinë e krijuar, apatinë dhe letargjinë e politikave kosovare dhe atyre ndërkombëtare karshi Kosovës, është hedhur në ofensivë të ethshme politike, diplomatike, obstruktive, diversive e subversive. Tashmë nuk ka asnjë dyshim se Beogradi zyrtar dhe kuazi opozitar jo vetëm nuk duan normalitetin paqen dhe pajtimin në Kosovë e më gjerë, por përkundrazi përpiqen qoftë edhe me ndërhyrje e provokime të tilla brutalet të   ndërlikojnë, të bllokojnë dhe diskreditojnë më tej realitetin e ri kosovar dhe angazhimin ndërkombëtar paqekrijues e paqeruajtës, me synim që në këtë mënyrë të lehtësojnë realizimin e skenarëve për rivendosjen e raporteve të sundimit e dominimit ose në pamundësi të kësaj edhe për copëzimin e Kosovës dhe territorit të saj.

Ekskosovarizimi rrezikon serbët kosovarë

Shoqata e Ish të Burgosurve Poltikë e Kosovës kundërshton me forcë revanin e ri pseudoelektoral hegjemonist të Beogradit jo vetëm pse ai është kundër Rezolutës 1244, vendimeve të qendrave ndërkombëtare të vendosjes si dhe dokumenteve universale ndërkombëtare, jo vetëm pse ai është drejtuar dhe projektuar si sulm i drejtpërdrejt kundër lirisë, pavarësisë së shumicës shqiptare në Kosovë, jo vetëm se drejtohet kundër paqes, pajtimit dhe prosperitetit në Kosovë, por madje edhe sepse këto zgjedhje, që ne mënyrë demagogjike justifikohen si  nevojë dhe interes i serbëve të Kosovës, në të vërtetë janë në kundërti edhe me vetë kushtetutën dhe ligjet e Serbisë dhe si të tilla, duke qenë të paligjshme, antidemokratike dhe luftënxitëse ato jo vetëm nuk ndihmojnë por përkundrazi rrezikojnë seriozisht pikërisht dhe posaçërisht pozitën e komunitetit serb në Kosovë dhe perspektivën e tyre të vërtetë demokratike, paqësore e evropiane.

Për më tepër duke ndjekur e imponuar qasje krejt të ndryshme ndaj komunitetit shqiptar në Preshevë, Bujanoc e Medvexhë, i cili është dhe nuk mund të mos trajtohet si faktor ekuivalent me komunitetin serb në Kosovë, kreu politik i Beogradit rrezikon paqen dhe stabilitetin në regjion. Standardet e dyfishta janë dyfish të rrezikshme.

Krerët e Beogradit u imponojnë serbëve të Kosovës zgjedhje që sigurisht nuk sjellin zgjidhje por sherre të reja. Duke u futur kontrabandë në një sistem të huaj m të një vendi fqinj, serbët e Kosovës detyrohen të votojnë edhe një herë për forcat ultranacionaliste serbomëdha që u kanë shkaktuar edhe vetë atyre aq shumë dëme e pasoja dhe njëkohësisht votojnë sërish kundër lirisë dhe të ardhmes së lirë e të pavarur të Kosovës që është poashtu edhe vendi i tyre. Rrjedhimisht, në këtë mënyrë serbët e Kosovës detyrohen të votojnë kundër vetë perspektivës së tyre të lirë, paqësore, e evropiane. Duke i instrumentalizuar sërish serbët e Kosovës në aventurat hegjemoniste panserbe, duke i përdorur ata në luftën e tyre për pushtet, dhe duke i duke i ekskosovarizuar e antikosovarizuar politikisht ata, Beogradi është në rrugë që të prodhojë edhe një dramë të re me epilog si ai me serbët e Kninit në Kroaci.

Apel për pjekuri e larpamësi

ShBPK fton serbët e Kosovës që të mos lejojnë të bien sërish në grackën e instrumentalizimit dhe manipulimit të qendrave politike militariste e pseudodemokrate të Beogradit, të cilat asnjëherë nuk janë merakosur për fatin e vërtetë dhe hallet vërteta të serbëve kosovarë. Votën e tyre demokratike serbët e Kosovës duhet ta shfrytëzojnë dhe funksionalizojnë në interes të së ardhmes së tyre në zgjedhjet e përbashkëta në Kosovën e përbashkët të pavarur e evropiane dhe në sistemin e saj demokratik zgjedhor.

Shoqata fton praninë ndërkombëtare në Kosovë dhe qendrat ndërkombëtare të vendosjes që të shfrytëzojnë të gjithë influencën e tyre dhe instrumentet e diplomacisë preventive që të parandalojnë ringjalljen e atavizmave luftënxitës në Kosovë dhe regjion. Përvoja e deritashme ka dëshmuar sa i rrezikshëm është tolerimi i aventurave hegjemoniste panserbe, jo vetëm për popujt përreth, por edhe për vetë popullin serb dhe perspektivën e tij demokratike e evropiane.

Pa kontestuar të drejtën e ligjshme të të gjithë qytetarëve në Kosovë për mendim të lirë, për organizim dhe veprim të lirë politik, ish të burgosurit politikë kundërshtojnë  subverzionin elektoral serbomadh në Kosovë. SHBPK i kupton si të drejta dhe të natyrshme format e ndryshme të reagimeve dhe protestave kundër agresionit zgjedhor të Beogradit në Kosovë. Shoqata solidarizohet me protestën e iniciuar nga lëvizja “Vetvendosje” dhe shpreh besimin se ajo do të jetë reagim i fuqishëm, por i qetë, i  pjekur dhe demokratik.  Me diversionin e tyre politiko-zgjedhor, qarqet strategjike serbomëdha synojnë tollovitjen dhe destabilizimin e Kosovës se re të pavarur, qoftë edhe duke sakrifikuar serbët e Kosovës dhe interesat e tyre. Është detyrë e forcave demokratike e paqedashëse shqiptare, serbe si edhe atyre ndërkombëtare që të parandalojë skenarët e revanshizmit dhe rimilitarizimit të Kosovës dhe Ballkanit. Shoqata fton ish të burgosurit politikë dhe të gjithë qytetarët, që edhe në situata të tilla provokative të dëshmojnë maturinë, pjekurinë dhe largpamësinë që i karakterizon.

Për Kryesinë e Shoqatës

Hydajet Hyseni, Kryetar