Albin Kurti në mesin e bashkëatdhetarëve dhe miqtë tanë skandinavë

Askush nuk e ka pyetur popullin për decentralizimin, për ndryshimin e flamurit, për nxjerrjen e Kushtetutës…

Shkruan: Fadil Shyti - Malmë, 21. 06. 2009

___________________________

Pas disa takimeve me peshë në politikën kombëtare, me politikanët danezë dhe suedezë dhe në takimet me bashkatdhetarë në Kopenhagë, Baleruap dhe në Stokholm, sot, në lokalet e Shoqatës “Iliria” në Malmë, të Suedisë jugore, udhëheqësi i Lëvizjes Vetëvendosje Albin Kurti pati një takim me bashkatdhetarët që jetojnë në këtë qytet dhe në rrethinë. Ishin të pranishëm shumë bashkatdhetarë jo vetëm nga Kosova por, dhe nga vise tjera shqiptare si atdhetari i devotshëm tetovar i çështjes kombëtare, Xhemil Zeqiri e të tjerë; veteranë të luftës së UÇK-së, ish-të burgosur politikë dhe shumë veprimtarë që e kanë ndihmuar luftën heroike të kombit shqiptar.

Albin Kurti, para të pranishmëve foli për rrjedhat e djeshme dhe të sotme politike në të gjitha viset shqiptare. Me një largpamësi të pashoqe dhe me fakte të pathyeshme; - ai, demonstroi qëndrimet e Lëvizjes Vetëvendosje e cila për vitet të tëra të pasluftës, është në ballë të rezistencës popullore, kundër sundimit kolonial të siç e quajti Ay, të “mbretërisë së Kosovës” drejtuar nga “mbreti” suprem, Peter Faith dhe “mbretëresha”, Tina Kajdanov.

- Askush nuk e ka pyetur popullin për decentralizimin, që e bënë de fakto dhe de jure ndarjen e Kosovës dhe po e krijon një shtet serb, brenda Kosovës.

- Askush nuk e ka pyetur popullin për ndryshimin e flamurit, që de fakto dhe de jure e ka cenuar rëndë identitetin tonë.

- Askush nuk e ka pyetur popullin për nxjerrjen e Kushtetutës e cila në nenin 3 e konteston, bashkimin e Kosovës me ndonjë shtet tjetër fqinjë, këtu shihet bllokada për ribashkim me Shqipërinë.

- Askush nuk e ka pyetur popullin për privatizimin e sipërmarrjeve të mëdha ekonomike, me interes të madh kombëtar.

Të gjitha këto do të duhej të bëheshin sipas parimit të VETËVENDOSJES dhe me REFERENDUM. Kështu, po kuptohet qartë se, diplomacia e sotme botërore është e fokusuar që ta pengojë ribashkimin e kombit shqiptar, pra, ribashkimin Kosovës dhe të viseve të tjera shqiptare me shtetin amë - Shqipërinë. Po, përse e bëjnë këtë - pyeti dhe njëkohësisht sqaroi, Albin Kurti ; - e bëjnë sepse, qarqe të caktuara anti-shqiptare të lidhura me njëmijë e një fije interesash me Serbinë, nuk e duan kombin shqiptar të fortë ekonomikisht, politikisht as ushtarakisht në Ballkan. Duan që, ashtu ta sundojnë më lehtë, duan që, ashtu ta shfrytëzojnë më lehtë pasurinë ekonomike etj...

Ndërsa, sa i përket shpalljes së pavarësisë Kurti theksoi: “Kjo i ngjanë sikur njeriu kur është i etur dhe ia ofrojnë një gotë pa ujë; por, ai duke menduar se po i sjellin ujë, gëzohet; mirëpo, kur e sheh se gota është e zbrazur, nuk i mbetet tjetër veçse, të kërkojë ujë gjetiu”. Ndërsa, sa i përket flamurit të Kosovës, Ai theksoi se; jo rastësisht ai flamur sipas planit famëkeq ahtisarian, i ka dy ngjyra të flamurit serb dhe hartën e Kosovës e kanë vendosur ashtu, që Kosova të duket e vogël dhe kinse e pandarë, përkundër faktit që politikanët rrejnë përditë se “Kosova nuk do të ndahet”. -thonë kështu, si në këngët folklorike, kur këndon Shkurte Fejza.

Ndërsa, fatkeqësisht, të gjithë po e shohim se, Kosova është e ndarë në enklava dhe si mund të bashkohet Mitrovica, kur Kosova kur s´ka ushtri?! Forca e Sigurisë së Kosovës (FSK), është e përcaktuar si mbrojtje civile, apo si aneks i policisë, për të ruajtur rendin dhe ligjin në Kosovë e jo kurrsesi, për t´i mbrojtur kufijtë e saj.

Qarqet ndërkombëtare dhe ato qeveritare të Kosovës nuk janë të interesuara për zgjidhjen e çështjes por, për ruajtjen e “stabilitetit” politik në Kosovë, peshën kryesore të kësaj paqeje të brishtë, po e marrin si kurdoherë vet shqiptarët mbi supe!... Këto qarqe të brendshme dhe të jashtme po veprojnë kështu pa përgjegjësi duke menduar se; “nuk duhet ta egërsojmë “ujkun” serb”, duke e ditur se pa asnjë vështirësi i tejkalojnë problemet e tyre të drejtuar e të ndihmuar nga politikanët tanë të cilët kanë bërë kompromise të pafalshme në dëm të çështjes shqiptare në përgjithësi dhe të Kosovës në veçanti.

Albin Kurti e pasqyroi gjendjen tepër të rëndë që po mbretëron në Kosovë; kur mbi 60% e shqiptarëve jetojnë në zgrip të jetesës me vetëm 1-2 dollarë në ditë. Kur në Kosovë janë mbi 60 % të papunë, atje po bëhen keqpërdorime të mëdha me tenderët nga politikanë të ndryshëm të cilët janë lidhur me biznesmenët të cilët nga 400 kamionë në ditë andej nga veriu i fusin mall nga Serbia, madje kontrabandë tani kanë filluar të bëjnë dhe biznesmenë nga shtete të tjera duke e parë se po kanë përfitime të mëdha ekonomike.

Pas asaj paraqitjeje të gjendjes reale, udhëheqësi i Lëvizjes Vetëvendosje, iu përgjigj dhe shumë pyetjeve të bashkatdhetarëve. Porosia ime - tha Albin Kurti është: “që të organizoheni fort si mërgimtarë që jeni të një gjaku dhe të një gjuhe, t´i dërgoni fëmijët në shkolla shqipe, që ta ruajmë brezin e ri të mos asimilohet etj. Pastaj, të inkuadroheni në jetën politike të shteteve ku jetoni, që ashtu ta ndihmoni çëshjen tonë, por edhe jetën tuaj, t´i gëzoni të drejtat tuaja qytetare etj.

Takimi me bashkatdhetarët kaloi kudo në një atmosferë vëllazërore, mërgimtarët kërkuan njëzëri që, Ai dhe ithtarët e tij të Lëvizjes Vetëvendosje, të vinë sa më shpesh ta vizitojnë Skandinavinë, sepse jo pak po ndihen të zhgënjyer nga politikanët e sotëm shqiptarë. Albin Kurti, së shpejti do të kthehet në Kosovë, për të vazhduar më tej veprimtarinë e tij, në ballë të Lëvizjes Vetëvendosje.

Albin Kurti: Dy me një në favor të Serbisë!