Qeveria shqiptare i ka dhuruar Greqisë rreth 225 km2 sipërfaqe ujore!

NDRYSHIMI I KUFIRIT U PROJEKTUA NË BISEDAT

SEKRETE NË KORFUZ!

Marrëveshja për dhurimin e ujërave territoriale të shtetit shqiptar në favor të Greqisë është projektuar në ishullin gerk të Korfuzit. "Gazeta Shqiptare" zbardh takimin e dy komandantëve të Flotave më 28 nëntor 2008. Marrëveshja e dhurimit të 225 km hapësirë detare për grekët, u bisedua me harta greke, në ishullin grek.

Shkruan: Tedi Blushi - Tiranë, 01. 05. 2009

____________________________

Ndryshimi i kufirit u projektua në Korfuz

Marrëveshja për dhurimin e ujërave territoriale të shtetit shqiptar në favor të Greqisë është projektuar në Korfuz. Negociatat sekrete janë zhvilluar ndërmjet Komandantit të Flotës Detare shqiptare, Kristaq Gërveni dhe homologut të tij grek, Jorgos Karamanliki. Ministria e Mbrojtjes greke bën të ditur në faqen e saj zyrtare në internet, se vizita zyrtare e Gërvenit në ishullin e Korfuzit ka zgjatur tri ditë, respektivisht në datat 26, 27 dhe 28 nëntor 2008. Pra çështja e dhurimit të rreth 225 km2 sipërfaqe ujore në favor të Athinës zyrtare është mbyllur ditën e Pavarësisë së Shqipërisë. Ndërkohë, “Gazeta Shqiptare” ka mundur të sigurojë ekskluzivisht fotot nga ky takim, ku të dy autoritetet e larta ushtarake shfaqen të gëzuar për rezultatet e marrëveshjes dypalëshe të arritur.

Foto: Komandanti i Flotës Detare shqiptare, Kristaq Gërveni dhe homologu i tij grek, Jorgos Karamanliki

Një detaj interesant që bën të ditur Ministria e Mbrojtjes e Greqisë, është fakti se Gërveni dhe Karamanliki janë takuar në Korfuz me prefektin dhe peshkopin ortodoks të ishullit grek. Fakti se përcaktimi i vijës së re kufitare mes dy shteteve është vendosur në Greqi, sqaron edhe shkakun pse Komandanti i Flotës Detare shqiptare u përpoq dy ditë më parë të hidhte poshtë skandalin e zbuluar nga “Gazeta Shqiptare” duke marrë në referencë një hartë ushtarake të shkruar në greqisht. Pra kuptohet qartë se kjo hartë i është dhuruar Gërvenit nga homologu i tij grek, Karamanliki. Madje, Komandanti i Flotës Detare shqiptare, në një intervistë dhënë një ditë më parë për një të përditshme shqiptare ka pohuar se vija e re e kufirit detar mes dy shteteve është përcaktuar në bazë të hartave ushtarake greke. Konkretisht Gërveni shprehet se, “ne pranuam të përdorim atë hartë, por pasi u verifikuan që ishin të njëjta me hartat angleze dhe ato amerikane. Ato janë harta që zbatohen në sistemin e pranuar europian”, - shprehet ai. Pra Shqipëria, ndonëse një vend anëtar i NATO-s, nuk ka as harta të saj të kufirit, por iu referohet atyre të fqinjit tonë jugor. Me faktet e reja, skandali i çështjes së kufirit detar thellohet edhe më tej.

Qeveria shqiptare i ka dhuruar Greqisë rreth 225 km2 sipërfaqe ujore

Filmi: Akti i nënshkrimit të marrëveshjes Basha - Bakojanisë, në prani të Berishës dhe Karamanlisit!

Qeveria shqiptare i ka dhuruar Greqisë rreth 225 km2 sipërfaqe ujore. Me ndihmën e një eksperti topograf, “Gazeta Shqiptare” ka arritur të zbardhë pak ditë më parë faktin tronditës që fshihet në marrëveshjen shqiptaro-greke “Për delimitimin e zonave përkatëse të shelfit kontinental dhe zonave të tjera detare që përkasin në bazë të së drejtës ndërkombëtare”. Vija e re kufitare që ndan ujërat territoriale të dy shteteve, e që përbëhet nga 150 pika, rezulton sipas ekspertit topograf se ka prirjen për t’u futur në drejtim të Karaburunit, pra në dëm të Shqipërisë, me afërsisht 11 km. “Trekëndëshi” i dhuruar palës greke fillon nga pika 120 e vijës kufitare. Sipas matjeve të kryera rezulton se pika e fundme e vijës kufitare të ujërave territoriale me numër 150 është spostuar në drejtim të ujërave shqiptare me rreth 30 km më tej ose e kthyer në milje detare, me rreth 16 milje.

Tedi Blushi: Berisha shet një pjesë të Shqipërisë!