”Ky njeri është armik i betuar i partisë, prandaj duhet të varet në litar”!

HYSEN SHESHORI: KOMUNISTI PASIONANT SALI BERISHA

NDIKOI DREJTPËRSËDREJTI NË DENIMIN TIM ME VDEKJE!

Në një intervistë dhënë në dhjetor të vitit 2002, për gazetën “Plaga”, organi i Shoqatës së ish-të Burgosurve Politikë, Hysen Sheshori rrëfen se në sallën e gjyqit, nga ku mori dënimin me vdekje, nuk ka pasur një dëshmitar dosido, por vetë Sali Berishën. Berisha (kryeministri aktual i Shqipërisë) para trupit gjykues dhe sallës deklaron duke bërtitur ”Ky njeri është armik i betuar i partisë, prandaj duhet të varet në litar” (!!!)

Shikoni: Sali Berisha dëshmitar kundër Hysen Sheshorit (!!!)

PLAGA: Z. Hysen, cili ishte motivi që ju shtyu t’u kundërviheshit regjimit duke vënë trakte?

SHESHORI: Cënimi i pronës private, që për mua ishte i shtrenjtë. Sepse ishte e lidhur me dinjitetin tim dhe me qenien time; ishte arsye kryesore që më detyroi të bëj këtë veprim, duke iu përgjigjur në këtë formë. Ajo pronë e vogël ishte për mua atdheu im, të cilin ma mohuan.

PLAGA: Z. Hysen, çfarë përmbajtje kishin traktet tuaja dhe, a kishin ndonjë shenjë dalluese ato?

SHESHORI: Nga viti 1961 deri në vitin 1974 ishte një kohë e përzier me urrejtje, e cila më shtyu që ta shpreh atë me ngjitjen e parullave, nga e cila ndjeva një farë sadisfaksioni personal edhe për shumë viktima të tjera, duke i bërë thirrje asaj pjese të pastër të popullit shqiptar për një luftë kundër partisë shtet.

PLAGA: Z. Hyseni, ju lutemi mund të na thoni si u zhvillua gjyqi dhe a i mbani mend dëshmitarët?

SHESHORI: Në një sallë ku morën pjesë rreth 300 persona me një trup gjykues të papranueshëm dhe me një gjendje fizike jo normale, si pasojë e torturave gjatë hetimit, për avokat as bëhej fjalë, unë dola para trupit gjykues. Gjatë gjykimit pashë shumë dëshmitarë që nuk i njihja, të cilët bënin dëshminë të frikësuar dhe pa më parë mua. Në mendje më mbeti vetëm njëri, që ishte i veçantë nga të tjerët. Trupgjatë dhe energjik, me hap të sigurt u paraqit për dëshmitar. Ai u ndal para trupit gjykues dhe pas formaliteteve, me një theks malësori, me eufori, filloi të flasë para trupit gjykues duke treguar se si e kishte gjetur traktin që kishte përmbajtje të theksuar armiqësore, të cilin e tundte para trupit gjykues dhe sallës...”Ky njeri është armik i betuar i partisë, prandaj duhet të varet në litar”, - tha ai duke bërtitur. Mua, më shumë se kërkesa e tij për të më varur në litar, më bëri përshtypje mënyra e ndërtimit të dëshmisë, që ishte e njëjtë me atë të hetuesve që më torturonin dhe më kryesorja, trakti që ai e nxori nga xhepi ishte i vitit 1962, ndërsa unë po gjykohesha në vitin 1975. A mund të guxonte njeri që ta mbante një trakt të tillë në atë kohë për 13 vjet?

Shikoni: Faksimilin e intervistës së Sheshorit dhe Sali Berishën

PLAGA: Po kush ishte ky njeri?

SHESHORI: Ky njeri, i cili është një komunist pasionant e fanatik i pandreqshëm, që për me arrit në majat më të larta të hierarkisë së pushtetit komunist ka përdorur dhe traktin tim duke ndikuar drejtpërdrejtë në dënimin tim me vdekje, ishte Sali Ram Berisha.

PLAGA: A jeni i sigurtë z. Hysen?

SHESHORI: Unë mund t’ju them që asnjëherë nuk mund të harrohet bisha që të kafshon.

PLAGA: Sa vjet u dënuat dhe sa bëtë?

SHESHORI: Fillimisht u dënova me vdekje, pastaj m’u fal jeta dhe dënimi u kthye në 25 vjet. Nga këto, bëra 17 vjet pa asnjë ndihmë.

PLAGA: Z. Hysen, si e ndjetë veten kur kryetari i PD-së dhe më pas kryetari i shtetit ishte dëshmitari juaj, që kërkoi t’ju varnin në litar për veprimtarinë tuaj antikomuniste?

SHESHORI: Kur dëgjova nëpërmjet radios se në Europën Lindore po frynte era e lirisë, s’kish si të mos gëzohesha, por kur pashë se në krye të atyre që protestonin ishte njeriu që më ka mbetur i ngulitur si simbol i pjesës më të keqe të këtij populli, fërkova sytë se nuk po u besoja. Shumë njerëz gëzoheshin, ndërsa unë i thosha vetes: “Medet, po shpëtojmë nga shiu, e po biem në breshër”. Unë jo vetëm që nuk i kisha bërë ndonjë të keqe, por as nuk e njihja fare, ndërsa ai që më shihte për herë të parë, m’u vërsul me akuza si bisha që do të shqyejë prenë e vet.

PLAGA: Si dhe ku jetoni?

SHESHORI: Që nga dita e “transferimit prej burgut izolues në ambientet e burgut të hapur 17 mars 1991 e deri sot, duke mos m’u kthyer dinjiteti që është i lidhur me pronën. E kaloj natën tek një dashamirës i imi që është dhe shok vuajtjesh, ndërsa ditën e kaloj në Bibliotekën Kombëtare dhe pjesën tjetër, meqë jam i lodhur nga vuajtjet dhe mosha, e kam të nevojshme që të pushoj, prandaj në drekë e tremb gjumin me syhapur stolave të parqeve dhe bordurave të rrugëve.

PLAGA: Po sot, si e ndjeni veten?

SHESHORI: Sot duket se jam i gjallë, por kjo nuk do të thotë që jetoj.

* * *

Kush është Hysen Sheshori

Hysen Sheshori ka lindur më 15 maj 1934 në Prezë të Tiranës. U arrestua më 29 gusht 1974, me akuzën agjitacion dhe propagandë. Pasi bëri një vit hetuesi, në vitin 1975 iu bë gjyqi. E dënuan me pushkatim, pastaj Gjykata e Lartë vendosi 25 vjet burg. Pjesën më të madhe të dënimit e ka bërë në burgun e Spaçit, ndërsa vitin e fundit e ka bërë në burgun Shën Vasil në Sarandë.

Hysen Sheshori u akuzua se shpërndante trakte kundër regjimit të Enver Hoxhës. Këtë veprimtari ai e ka kryer për 14 vjet rresht që nga viti 1961 e deri në vitin 1974 kur u arrestua. Sigurimi i Shtetit e ndiqte, por arrit ta zbulojë vetëm pas 14 vjetësh me trakt në dorë. Për gjithë kohën e diktaturës, ai ka shpërndarë 41.100 trakte në një periudhë 14-vjeçare, nga viti 1961-1974. Në momentin që është arrestuar është mbajtur i lidhur këmbë e duar për 24 orë. Pastaj ndaj tij kanë nisur torturat më çnjerëzore.

Pas burgosjes së Hysen Sheshorit, familja e tij u internua në fshatin e thellë, Mustafa Koçaj, të zonës së Baldushkut. Dy fëmijët e vegjël dhe nëna e tyre jetonin në një kasolle në kushte tepër çnjerëzore dhe survejoheshin nga Sigurimi famëkeq i Shtetit.

Komentin tuaj mund ta shkruani KËTU

( Moderatori i www.pashtriku.org )