Lëvizja Popullore e Kosovës

Reagim ndaj marrëveshjes Shqipëri-Greqi

për kufijtë detarë

Shikoni: Studimi, si iu dhurua Greqisë hapësira detare

Kryesia e Lëvizjes Popullore të Kosovës (LPK), është duke i përcjellë me shqetësim zhvillimet lidhur me ratifikimin e marrëveshjes për përcaktimin e vijës së re të kufirit detar të Shqipërisë me Greqinë, e cila u firmos në muajin prill nga ministrat e jashtëm, të dy vendeve dhe më datën 25 qershor, u miratua nga komisioni parlamentar i ligjeve.

Qeveria shqiptare, me vetëdije ose për paaftësinë e ekspertëve të saj të ministrisë së mbrojtjes dhe asaj të punëve të jashtme, tenton tani të ratifikojë me shumicë votash këtë dokument.

Qeveria shqiptare, duke pranuar firmosjen e një dokumenti që cenon ujërat kombëtare në detin jon me rreth 354.4 km2, të cilat i “dhurohen” Greqisë, ka dështuar në mbrojtjen e sovranitetit të Shqipërisë.

Shqetësues për LPK-në dhe opinionin e gjerë,  ka qenë dhe mbetet, nga njera anë mungesa e transparencës nga qeveria shqiptare për anekset e marrëveshjes e përmbajtien e tyre dhe, nga ana tjetër, përforcimi gjithnjë në rritje i bindjes se në marrëveshje e anekse të saj, ka mjaft pasaktësi teknike e deri gabime përllogartjesh. ato cënojnë rëndë integritetin e hapësirës ujore, nënujore e ajërore të republikës së shqipërisë.

Kjo marrëveshje që synohet të ratifikohet ka jo vetëm pasoja ekonomike dhe gjeografike, por mban më vete dëme politiko-strategjike zinxhirore për kombin e rrezikon paqen në rajon.

Ratifikimi i kësaj marrëveshje do kishte pasoja te mëdha jo vetëm për statusin e barabartë të kombit tonë, për kapitalin e naftës, për pasuritë tjera detare, për zhvillimin ekonomik të vendit tonë, por, edhe për statusin e tashëm të kompaktësinë tokësore të Shqipërisë.

Tirana zyrtare përpara se ta ratifikojë një marrëveshje të tillë, duhet që nga fqinji jugor të kërkojë zgjidhjen e çështjes çame.

Tani kur fjalën e fundit lidhur me këtë marrëveshje duhet ta thotë seanca plenare e kuvendit të Shqipërisë që mbahet më 19 tetor, LPK kërkon nga ligjvënësit që të njëjtën të mos e ratifikojnë duke konsideruar se kjo marrëveshje shkel hapur sovranitetin kombëtar të republikës së Shqipërisë.

Andaj i bëjmë apel Kuvendit të Shqipërisë që, duke qenë se bëhet fjalë për një problem jetësor si integriteti i vendit, të mos merret në diksutim, ananlizë e miratim në seancën e radhës e deri sa të bëhet transparenca e nevojshme me ekspertë publik, duke shmangur edhe çdo pasaktësi të mundëshme teknike në përllogaritjet.

Për kryesinë e LPK-së - Hasan Meta

Prishtinë, 14 tetor 2009