Në fokus

KUVENDI I SHQIPËRISË SHTYN PA AFAT RATIFIKIMIN E MARRËVESHJES SHQIPËRI - GREQI, PËR PËRCAKTIMIN

E KUFIRIT DETAR

STOP RATIFIKIMIT TË MARRËVESHJES NGA PARLAMENTI I SHQIPËRISË, QË CËNON SOVRANITETIN E VENDIT!

Pas presionit të vazhdueshëm mediatik, parlamenti shqiptar shtyn pa afat ratifikimin e marrëveshjes për përcaktimin e kufirit detar mes Shqipërisë dhe Greqisë. E parashikuar për të kaluar në seancën plenare të së hënës, në datën 19 tetor, marrëveshja tanimë nuk ekziston në axhendën parlamentare. Në të nuk shkruhet asnjë rresht për ditën se kur do të bëhet ratifikimi i saj. Marrëveshja për përcaktimin e kufirit detarë me Greqinë, që u firmos mes dy qeverive në 27 prill 2009 u bë e njohur pas publikimit të fakteve tronditëse nga “Gazeta Shqiptare”, e cila ishte e para media në vend që zbuloi se nga ky pakt me Athinën cenohej rëndë sovraniteti territorial i vendit.

Në disa numra rresht, ‘GSH’ vërtetoi asokohe se qeveria Berisha i kishte dhuruar Greqisë nëpërmjet nënshkrimit të kësaj marrëveshjeje një sipërfaqe të madhe ujore në detin Jon. Fakti i pretenduar do të vërtetohej vetëm pak muaj më vonë nga ish-drejtori i Institutit të Tipografisë Ushtarake të Shqipërisë, koloneli Myslym Pashaj, me gradën shkencore “Kandidat i shkencave”, dhe i laureuar me titullin “Mjeshtër kërkimesh”.

Në 28 shtator 2009, ‘GSH’ botoi ekskluzivisht studimin prej 117 faqesh të kolonelit Pashaj, sipas të cilit nga kjo marrëveshje cenohej rëndë sovraniteti territorial I Republikës së Shqipërisë, me 354.4 km2 sipërfaqe ujore në detin Jon. Publikimi i këtyre fakteve tronditëse ngjalli menjëherë reagimin e ekspertëve më të njohur në vend të së drejtës ndërkombëtare, të ushtarakëve shqiptarë si edhe të 72 shoqatave atdhetare-kulturore, që I kërkuan Kuvendit mosratifikimin e marrëveshjes shqiptaro-greke për delimitimin e kufijve detarë.

Në datën 25 qershor, Komisioni Parlamentar i Ligjeve e miratoi këtë marrëveshje në një mbledhje “të fshehtë”, ku media nuk u thirr të ishte e pranishme. Pak ditë më vonë, ‘GSH’ do të zbardhte të plotë procesverbalin e kësaj mbledhjeje, ku drejtoresha e Institutit Gjeografik të Ushtrisë, Miranda Zeka deklaronte “mungesën e hartës së kufirit të ri të përcaktuar në këtë marrëveshje”.

Faktet dhe argumentet bindëse që pasqyroheshin çdo ditë në faqet e “Gazeta Shqiptare” që apelonin nevojën e mosratifikimit të marrëveshjes në Kuvend, nxitën edhe reagimin e opozitës. Kreu i Partisë Socialist, Edi Rama në një prononcim për mediat bëri një falenderim të posaçëm për ‘GSH’ dhe deklaroi ngritjen e një grupi pune me ekspertë që do të merreshin me ankimimin e kësaj marrëveshjeje në Gjykatën Kushtetuese. Hap, i cili pritet të zyrtarizohet ditën e sotme.

Partia Socialiste dhe parti të tjera të opozitës ( të majtë e të djathtë) do të paraqesin të martën në Gjykatën Kushtetuese ankimimin e marrëveshjes për kufijtë detarë midis Shqipërisë dhe Greqisë. Marrëveshja është nënshkruar nga shtatë parti të majta e të djathta, ndërsa në këtë marrëveshje nuk është përfshirë PBDNJ. Marrëveshja Shqipëri-Greqi për kufijtë nuk do të shqyrtohet në tri javët e ardhshme, pasi nuk është përcaktuar në kalendarin trejavor të parlamentit. Ndërkohë nga Kuvendi nuk bëhet e ditur se kur do të ratifikohet kjo marrëveshje e shumëpërfolur javët e fundit në media. Marrëveshja ishte parashikuar për t’u shqyrtuar në seancën plenare të së hënës, në datën 19 tetor, por në axhendën trijavore të Kuvendit kjo marrëveshje nuk figuron si çështje për shqyrtim. Megjithatë, ankesa e hartuar nga ekspertët e PS ndaj marrëveshjes do t’i paraqitet të martën Gjykatës Kushtetuese, së cilës i kërkohet interpretimi i ligjshmërisë së marrëveshjes.

Konstitucionalistja, Aurela Anastasi, tha dje se marrëveshja për kufirin detar e Shqipërisë me Greqinë do të pezullohet, për aq kohë sa Gjykata Kushtetuese do të shprehet për të pas ankimimit të Partisë Socialiste. Anastasi u shpreh dje se kjo çështje mund të lërë shteg për interpretim, pasi asnjë nga 7 firmëtarët nuk janë deputetë të betuar në Kuvend. Kërkesa pranohet, nëse në statutin e të paktën një prej partive ankimuese është e sanksionuar mbrojtja e interesave kombëtare. “Partia politike është një subjekt që mund ta vërë në lëvizje Gjykatën Kushtetuese. Megjithatë, në lidhje me legjitimitetin e këtij subjekti për të paraqitur këtë kërkesë konkrete shprehet vetë Gjykata Kushtetuese. Është organi kompetent që shqyrton legjitimitetin e subjektit që vë në lëvizje Gjykatën Kushtetuese.

Automatikisht ligji organik i Gjykatës Kushtetuese ka parashikuar pezullimin e procedurave deri në çastin që Gjykata Kushtetuese do të shprehet mbi kushtetutshmërinë e marrëveshjes ndërkombëtare. Kushtetuta vetë ka parashikuar një kontroll apriori, përpara ratifikimit për marrëveshjet ndërkombëtare. Kjo nuk është një procedure e njëjtë me ligjet e brendshme të vendit, pasi ligjet kontrollohen për pajtueshmërinë e tyre me Kushtetutën, vetëm pasi kanë hyrë në fuqi. Pra, vetëm për ligjet e brendshme Kushtetuta ka parashikuar një kontroll të kushtetutshmërisë a posteriori”, - tha konstitucionalistja, Aurela Anastasi.

(Pashtriku.org. 16. 10. 2009)