Pak fjalë për Xhavit Halitin

_______________________________________________________________________________________________________

USHTRIA ÇLIRIMTARE E KOSOVËS

EMËRTIM I XHAVIT HALITIT

Xhavit Haliti „Do të caktohet në sektorin e veçantë të Organizatës, drejtues i sektorit, i cili, në të vërtetë është bërthama e parë e Shtabit të Përgjithshëm të Ushtrisë Çlirimtare të Kosovës. Edhe përcaktimi i emërit të kësaj strukture do të ketë për "nun" pikërisht Xhavit Halitin. Në njërin nga takimet ilegale të Kryesisë së Lëvizjes Popullore të Kosovës, Xhavit Haliti do të propozojë për emërin, Ushtria Çlirimtare e Kosovës, dhe kjo do të gjejë miratimin e duhur.“

Shkruan: Bedri Islami ( * ) Vjenë, 29. 01. 2011

________________________________________________________________________________________________

( JAM UNË, XHAVIT HALITI )

U bënë disa kohë, në të vërtetë të shtrira në periudha të ndryshme, sipas ardhjes së problemeve, që emëri i Xhavit Halitit është i pranishëm në disa media dhe raporte ndërkombëtare. Kohët e fundit ai u bë edhe "përsonazh" i të njohurës "Lë Mond", ashtu si ishte bërë "i njohur" edhe përmes raportit të Dik Martit. Por, edhe pa këto deklarime dhe arançime në shtyp, ai ka qenë gjithnjë një figurë e njohur politike, që ka lëvizur gjithnjë nëpër rrugëtimet e ngritjes së një qëndrese të armatosur, deri sa u bë pjesë e rëndësishme themeluese e drejtuese e saj. Jo rastësisht, ai u bë më pas edhe njëri ndër ngritësit e ngrehinës së shtetit të Kosovës.

"Konstatimet" e sotme rreth figurës së tij, e cila për shumë kohë ka qenë e mbështjellur me misterin e një jete ilegale, nuk janë dashamirëse, përkundrazi, ata përpiqen, me të gjitha mundësitë, duke u fshehur edhe pas anonimatit, për të bërë të dyshimtë gjithçka që ai ka bërë. Në të vërtetë, Xhavit Haliti nuk ka nevojë për mbrojtjen time. Jam i bindur se ajo që është më dëshmuese, qëndron në faktin se për shumë vite me rradhë, që nga rinia e herëshme dhe deri në ditët e sodit, ai ka bërë një jetë mes miqve dhe shokëve të tij, të cilët, në të shumtën e rasteve, kanë qenë dhe bartës të një përpjekje të madhe, ndoshta të pamendueshme se mund të përballohej, në të mirë të vendit të tyre.

Pra, ai nuk ka nevojë që të ketë "avokatinë" e askujt, mes të tjerëve, edhe timen. Mirëpo, ka një shkas shkrimi im i sotëm; në këto ditë vorbullash e fjalësh, akuzash dhe ngrehine të paqenë, kur më shumë po janë të pranishëm ata që nuk e kanë njohur kurrë e nuk dinë asgjë për të, nuk do të ishte e drejtë, që, ata, të cilët, në vite të ndryshme kanë qenë të afërt me të, ose bashkëpjesë së të njëjtës strukturë ilegale çlirimtare, të heshtin krejtësisht dhe të mos bëjnë të qarta, ata që janë për t'u bërë.

Në afishimin e shkurtër të jetës së tij, Xhavit Haliti ka “harruar" një fakt,

ose një shumësi faktesh, të cilët ndoshta nuk i ka parë të arsyeshme

t'i bëjë të njohur. Disa prej tyre e ndjej për detyrim ti risjell.

Në vitin 1986, për herë të parë, nga lëvizjet ilegale të kohës, do të krijohet Byroja Organizative, si forma paraqeverisëse e Kosovës në rrethanat e luftës. Halitit do ti caktohet brenda kësaj Byroje, një nga detyrat më themelore, përgatitja e strukturave të luftës. Më pas, Lëvizja Popullore e Kosovës, organizata, e cila mbi bazën e një Vendimi të posaçëm në Mbledhjen e 4’të të Përgjithshme, 1993, mori vendimin për kirijimin e Ushtrisë Çlirimtare të Kosovës, do e caktojë atë si bartësin kryesor të kësaj detyre, sidomos pas arrestimeve që ndodhën në atë kohë. Do të caktohet në sektorin e veçantë të Organizatës, drejtues i sektorit, i cili, në të vërtetë është bërthama e parë e Shtabit të Përgjithshëm të Ushtrisë Çlirimtare të Kosovës. Edhe përcaktimi i emërit të kësaj strukture do të ketë për "nun" pikërisht Xhavit Halitin. Në njërin nga takimet ilegale të Kryesisë së Lëvizjes Popullore të Kosovës, Xhavit Haliti do të propozojë për emërin, Ushtria Çlirimtare e Kosovës, dhe kjo do të gjejë miratimin e duhur.

Në njërin nga materialet denigruese ai është akuzuar lidhur me shpërdorimin e fondit "Vendlindja thërret". Nuk kam asnjë njohuri nga janë marrë informacione të tilla, kur për më tepër, të gjitha materialet që kanë lidhje me këtë fond, përdorimin e tij, përsonat përgjegjës, analizat, kontrollet dhe funksionet që ka pasur, janë të arshivuara dhe jo publike. Mirëpo unë, mund të them bindshëm, se në asnjë rast, Xhavit Haliti nuk ka qenë pjesë e strukturave drejtuese të Fondit "Vendlindja thërret". Është e vërtetë se drejtuesit e këtij fondi, ku më kryesori do të jetë Jashar Salihu, nënkryetar i Organizatës, do të kenë lidhje me sektorin e veçantë, ku ishte drejtues Xhavit Haliti, mirëpo, krahas afërsisë shoqërore, kjo do të jetë një lidhje organizative, rreptësisht e kontrolluar. Në sektorin e veçantë bënin pjesë edhe Ali Ahmeti e Jashar Salihu, më pas, pas largimit nga Kosova, do të bëhet pjesë edhe Azem Syla, por kontrollin mbi mjetet e ruante kurdoherë Kryesia e Organizatës.

Deri në mesin e vitit 1998, fondi, në shumicën e tij, është mbajtur nga anëtarët e Organizatës dhe dashamirësit e saj, të cilët nuk ishin budallenj dhe pa dinjitet sa të lejonin dikë, kushdo të ishte, që të shpërdoronte kontributin e tyre. Edhe ashtu, ai do të ishte një fond krejtësisht i pamjaftueshëm, ku edhe një mungesë, sado e vogël, do të dukej si një hata e madhe. Në një moment kur në Kosovë do të dërgoheshin, për shembull 30 mijë marka gjermane, kjo do të ishte një gjë e jashtëzakonshme.

Edhe pas qershorit të vitit 1998, kur fondi u rrit në mënyrë të ndjeshme, pothuajse në gjendje për të përballuar nevojat e gjendjes në Kosovë, me të gjitha përcaktimet e saj, Xhavit Haliti nuk do të jetë pjesë e strukturave drejtuese të saj. Këshilli i ri drejtues i fondit është zgjedhur në Mbledhjen e Këshillit të Përgjithëm të LPK’së, me 13 shtator 1998, dhe është afirmuar edhe një herë besimi ndaj Jashar Salihut dhe Xhemail Fetahut, hero i Kosovës, si drejtuesit kryesor. Mbi bazën e një vendimi të posaçëm të kësaj mbledhje, në drejtimin e Fondit në Shqipëri, janë dërguar dy shokë të tjerë, Halil Selimi dhe Ramiz Lladrovci. Kjo nuk do të thotë se Xhavit Haliti nuk kishte lidhje me strukturat e fondit në Tiranë, pasi gjërat lëviznin në më të shumtën e rasteve përmes kontrollit të tyre, por nuk ka pasur asnjë rast, që strukturat e kontrollit brenda fondit, të kenë pasur sinjalizim për shpërdorim të tij.

Ndërsa akuzat e tjera, për tregtinë e drogës, të çështjeve të tjera, janë aq banale, saqë është e pakuptueshme të futesh nëpër labirinthet e tyre. Ata janë dëgjuar ende pa filluar lufta në Kosovë, kanë vazhduar me intensitet të shtuar në fazat e ndryshme të saj, mirëpo kurrë, në asnjë rast, ata nuk kanë sjellur fakte e prova konkrete. Sepse nuk ka pasur.

Lidhjet e mia më të mëdha me Xhavit Halitin, megjithëse jo të shpeshta, janë në periudhën e luftës, kur unë drejtoja Lëvizjen Popullore të Kosovës, e pas saj. Jo gjithmonë kemi qenë në unison, kemi pasur edhe mendime të ndryshme, mirëpo, në fakt unë kam pasur gjithnjë respektin e duhur për figurën e tij. Nga vetë natyra ai është një njeri i heshtur, do të thoja, i lindur për punë ilegale, përmes tij kanë lëvizur gjëra tejet të rëndësishme, të cilat, asaj kohe, kanë pasur rëndësi jetike për luftën në Kosovë. Megjithëse duket si një njeri i rreptë, ai ka qenë në më tolerantët brenda organizatës. Qëndrimi i tij i heshtur, edhe kur është akuzuar, fillimisht në shtypin e shkruar shqiptar, në Kosovë e jashtë saj, akuza që nganjëherë përsëriten thuajse identike me akuzat e sotme, ka bërë nga njëherë që të krijohet përshtypja se kemi të bëjmë me një njeri që diçka fsheh. Në të vërtetë ai ka fshehur brenda vetes shumë sekrete të kohës, ka ende shumë gjëra që janë në veten e tij, mirëpo, kur e ka dashur rasti, ai ka kundërshtuar rreptësisht, duke iu referuar ligjeve të shteteve nga k

u i janë bërë akuza krejtësisht të sajuara, dhe, si fakt për të vërtetën, i ka mfituar ato.

Që nga dita kur Xhavit Haliti u përfshi në lëvizjen ilegale dhe deri në përfundimin e luftës në Kosovë ai ka bërë më shumë se 20 vite. Unë kam bindjen se atë e sulmojnë më së shumti pikërisht për atë që ka bërë në këto 20 vite dhe nuk ka qenë e rastit, që akuzat e sotme, ngjajnë krejtësisht me akuzat që i janë bërë dikur nga shërbimet e fshehta serbe. Pa e menduar ai u gjet në qendrën e një "cikloni" të quajtur Dik M. Ciklat e këtij "cikloni" shpërthyen edhe në disa media, meqenëse janë të përsëritura, do të thoja të stërpërsëritura, nuk kanë asnjë vlerë për atë vetë, hë për hë duket se i prishin punë imazhit të kosovës, por, në një ditë të ardhshme, jo të largët, ajo që ka shkuar, do të jetë edhe më e kthjelltë, ashtu si ndodh me gurët e qëndrueshëm pas stuhive. Kjo do të ndodhë domosdo. Këtu do të jemi dhe do e shohim.

* ) Autori ishte Kryetar i Lëvizjes Popullore të Kosovës në vitet e luftës në Kosovë.

BEDRI ISLAMI:

“GRUSHT SHTETI” I SALI BERISHËS!

…