Në mungesë të një strategjie ademjashariane i jemi kthyer variantit më karikaturial të “qëndresës“ gandiane!

DEMONSTRIMI I TURPIT

NGA NJË KOKË E PAFYTYRË!

Shkruan: Behxhet Sh. SHALA - Prishtinë, 08. 08. 2011

Në foto takimet e Bühlerit me Borisllavin dhe Hashimin

Një hyrje për të penduarit

Që nga qershori i vitit 1999 (nuk e them pas përfundimit të luftës sepse ajo nuk ka përfunduar ende), opozita, shoqëria civile, analistët e varur dhe të pavarur, intelektualët e kallashit dhe patriotët e sutlijashit, vërejtjen kryesore e kishin pse partia që i ka fituar zgjedhjet apo koalicioni qeverisës nuk po bën më shumë për veriun e Kosovës i cili ishte shndërruar në kolektor (mbledhës) i të gjitha fundërrinave kriminale. Veriu i Kosovës ishte shndërruar në Kolumbi të Pablo Eskobarit, Çikago të Al Kapones dhe Sicili të don Vito Korleones. Ndërkombëtarët kanë pasur informacione të mjaftueshme për këto aktivitete kriminale dhe nuk kanë intervenuar. Duke pirë shlivovicë dhe duke mrizuar në fundin e Stojadinkës nuk kishin si të intervenonin. Bënin punën për çka kishin ardhur! Kontrabandonin narkotikë, trafikonin qenie njerëzore, karburante, pije alkoholike, duhan dhe bënin biznes shumë fitimprurës! Arsyetimi për mosintervenim ishte se: ”i është lënë vend bisedimeve“! Janë investuar miliona e miliona euro për joshjen e strukturave kriminale të Serbisë në këtë pjesë të okupuar të Kosovës që të integrohen në shoqërinë kosovare. Në fakt, shumë prej këtyre mjeteve kanë shkuar në kontot e bosëve mafiozë të Veriut. Ata kanë krijuar zonat doganore si në Meksikon e Zapatës dhe Panço Vilës e që nënkupton promovimin e cubërisë si mënyrë zhvatjeje në shtetet që aspirojnë të integrohen në BE. Kriminelët e veriut të Kosovës e kanë promovuar mini shengenin në variantin më të mundshëm kriminal (kalimin e kufirit pa dokumente të udhëtimit dhe mallit pa iu nënshtruar procedurave të doganimit) shumë para Fatmir Sejdiut, Ivanovit e Bamir Topit! Veriun e kanë shndërruar në Saharë (shkretëtirë) institucionale dhe tokë të premtuar për aktivitete kriminale! Edhe pas shpalljes së kësaj pavarësie që e kemi, kritikat kryesore që u janë drejtuar institucioneve kanë qenë se: “e shitën veriun e Kosovës“! Ka pasur propozime që atje të dërgohen 5000 policë kosovarë ndërsa që edhe banorët që jetojnë në atë pjesë të Kosovës të armatosur sipas parimit të Mao ce Dunit. Të armatoset FSK dhe të dërgohet në kufijt verior! Populli i armatosur e bën luftën e armatosur! Nuk mund të ankohemi se ka pasur mungesë të ideve për “çlirimin“ e veriut të Kosovës. Mirëpo, të gjitha këto plane, projekte, angazhimin e strategjive të “strategëve“ të restoranteve dhe kafeterive si: Rings, Strip Depot, Papillon, Ex, Ultra, XL etj.janë bërë nga flladi i amshueshëm dhe zhurma e skajshme e muzikës së Cecës, Goran Bregoviqit, Frank Zapës, Shaqir Cërvadikut, Erik Kleptonit, Bob Marlit, Mik Xhegerit etj. Dëshira për të bërë diçka ka qenë XXL ndërsa mundësitë shumë S (mall), të vogla! Në mungesë të një strategjie ademjashariane i jemi kthyer variantit më karikaturial të “qëndresës“ gandiane! I vetmi person që vërtet ka derdhur djerës për Mitrovicën ka qenë Shkurte Fejza duke kënduar këngën: ”Jo nuk ndahet kurrë o Mitrovica“ në lokale pa klimatizim të mjaftueshëm! Para zgjedhjeve të fundit, gjatë fushatës elektorale më së shumti fituan ata që i dinin kanalet apo përrockat ku, në mënyrë të sigurt i bartnin politikanët që vizitonin “pjesën e okupuar të Kosovës” dhe të cilët pastaj deklaronin se: ”Jo nuk ndahet kurrë o Mitrovica“! Edhe pas zgjedhjeve të fundit u aktivizuan vuvuzelat që na prishnin komoditetin e “mrizit të zanave“ duke thënë se veriu i Kosovës iku, u shit, u fal për një pushtet që realisht nuk e kishin! Me pordhë të kafeterive donin ta çlironin Mitrovicën! Nëse nisemi nga fakti se për 12 vite me radhë veriu i Kosovë ishte në fakt Mars, Jupiter apo Neptun për institucionet e Kosovës atëherë çka është dashur të bëhej! Veriu ka qenë më Serbi se vet Serbia nga i cili shumica kanë çuar duart! Ne edhe mund të gënjejmë mirëpo me veriun e Kosovës janë marrë vetëm ata që kanë qenë emocionalisht të lidhur me te, ata që u kanë mbetur pronat atje dhe që janë shndërruar në muhaxhir në shtetin e tyre dhe shqiptarët, pjesë e krimit të organizuar që kanë bashkëpunuar me ivanoviqët, jakshiqët, stefanoviqët, bogdanoviqët, nikoliqët, tadiqët dhe koshtunicët! Prandaj, intervenimi i 25 korrikut ka qenë përpjekje për t’i lëvizur gjërat dhe i ka lëvizur gjërat.

Asgjë më nuk është si më parë

Tash po dalin analiza që e vërtetojnë thënien: ”se pasi të falet Bajrami, të gjithë bëhen myslimanë” duke kritikuar qeverinë përkatësisht Hashim Thaçin se ka hyrë në: “lluga pa sakicë” duke dërguar policinë speciale ROSU në aventurë! Po bëhen bilance dhe po del se Kosova po ndahet e humbur sepse nuk e ka vë nën kontrollë një pjesë të territorit të saj! Po thuhet se policët janë dërguar me nga 18 fishekë dhe se për të shpëtuar nga uria kanë marrë nga KFOR’i nga një ve. Mungesë elementare e moralit dhe respektit për ata që sakrifikuan jetën në këtë përballje me strukturat kriminale të veriut të Kosovës! Këtë po e thonë pikërisht ata që janë ketuar nën hijen e vezëve e të tjerëve dhe se edhe luftën e UÇK’së e kanë konsideruar aventurë! Në vend se të jenë krenarë që për herë të parë Kosova ka polici të motivuar kombëtarisht dhe në mbrojtje të interesave shtetërore. Policët e projektuar nga ana e këtyre, që për inate personale e kallin shtetin, më parë na kanë arrestuar, torturuar dhe vrarë! Në fund të fundit; cila do të ishte alternativa e mosveprimit?! Kritikuesit e kësaj përpjekjeje për shtrirjen e sovranitetit shtetëror nuk po e ofrojnë asnjë zgjidhje! Qenka dashur sipas tyre që për këtë intervenim të debatohet gjerë e gjatë dhe pastaj të votohet nëse duhet të intervenohet apo jo? Jo nuk qenkan bërë parapërgatitjet, jo nuk qenka siguruar përkrahja logjistike e shumë e shumë vërejtje të tjera nga “ekspertët për çështje sigurie“! E çka paska bërë Behgjet Pacolli gjatë dy vizitave të bëra në veri të Kosovës?! Paska tredhur miza a? Ai, vetëm nga modestia nuk ka dashur të bëjë publik këtë plan! Definitivisht, proceset kanë lëvizur dhe më nuk ka gjasa të riciklohet situata si ajo para 25 korrikut.

Për shkak të Hashimit (njerkës), le të vdes Kosova (djali)

Duket qartë se për shumë analistë, opozitarë, mercenarë, daullexhinj, shakaxhinj dhe të tjerë, problemi nuk qëndron të Serbia por te Hashim Thaçi. Shtrine Hashimin për tokë dhe do të çlirohet Afganistani! Vërtet mendoj se ky intervenim ka qenë shumë i nevojshëm! Pavarësisht kush do të ishte në pushtet, do ta përkrahja! Dhe mendoj se nuk bën ndryshe. Është çështje tjetër se si do të veprohet më tutje! Nëse nuk arrihet që në pikat kufitare 1 dhe 31 të kthehen doganierët dhe policët kosovarë atëherë edhe unë do t’i përkrah këta që po kritikojnë! Nuk ka respektim të reciprocitetit pa doganierë dhe policë kosovarë! Nuk ka luftë kundër krimit të organizuar nëse joviqët, ivanoviqët, jakshiqët, bogdanoviqët, stefanoviqët, tadiqët dhe iqët tjerë shkojnë në Beograd dhe me kriminelin demokrat Boris Tadiq hartojnë strategji dhe taktika si do të veprohet në “mbrojtje të kësaj toke serbe”. Që Beogradi të vendos për Kosovën! Një pjesë e ndërkombëtarëve janë krejt të pafytyrë sepse po qëndrojnë prapa barikadave të trungjeve dhe po i tërheqin penjt! Maskara si Galluqi nuk është as vet Tadiqi! Tash, merreni me mend se kush është marrë me çështjen e integrimit të veriut! Galluqi dhe gulluguqët e tjerë të UNMIK dhe EULEX! Pse nuk arrestohen krerët e krimit të organizuar? Gjenerali i KFOR’it Byhler e di shumë mirë se kush janë ata? Edhe gjenerali tjetër, Ksavier de Marnak që për shkak të kanaxheqit të bijës së tij e la veriun në flake, ka njohuri të mjaftueshme për krerët e krimit të organizuar në veri! Nëse EULEX dhe NATO kanë qëndrim neutral ndaj statusit të Kosovës, nuk do të duhej të kishin status neutral kundër krimit dhe kriminelëve! Këta, megjithatë po e kanë!

Serbia dhe Kosova në të ardhmën

Serbia nuk është e kënaqur me marrjen vetëm të veriut të Kosovës duke e qiprizuar Kosovën. Ajo dëshiron që përmes veriut dhe duke i instrumentalizuar serbët në pjesët e Kosovës qendrore ta bëjë Kosovën jofunksionale. Ta mbajë peng! Ndërkombëtarët po e tolerojnë këtë synim të Serbisë. Po e ndihmojnë Serbinë në realizimin e këtij synimi duke e federalizuar Kosovën dhe duke i “mbrojtur” kufijt e jashtëm të Kosovës me Serbinë duke i quajtur ata administrativë! Nëse nuk trandemi shpejt, konfliktin e kemi shumë afër! Ai po bëhet i pashmangshëm! Madje i domosdoshëm! Prandaj, mos të merremi me veten por me problemin dhe rrezikun real që po na kanoset! Ose, ta fusim kokën në rërë si makushi dhe me prapanicën krenare të ngritur lart t’i presim goditjet e radhës! Serbia po i përdor për qëllime të përfitimeve të gjithë kriminelët e vet duke i dorëzuar në Gjykatë, Millosheviqin, Karaxhiqin, Sheshelin, Mlladiqin dhe Haxhiqin, pse ne të mos i mbrojmë të drejtat tona! Nëse Kosova shndërrohet në federatë midis entitetit politik dhe kombëtar serb dhe shqiptarë, nuk ka ardhmëri këtu! Pavarësia dhe sovraniteti do të mbesin vetëm si diçka e dëshiruar, thuaja në duart tona por përgjithmonë të humbura! Një armiqësi që ndërpritet mund të shndërrohet në një bashkëjetësë ndërsa një armiqësi që nuk përfundon mund dhe do të shndërrohet në ferr!

Kam thënë botërisht se Hashim Thaçi është improvizues gjenial

dhe pehlivan që ka mbijetuar të gjitha situatat deri më tani

por që pashmangshëm do ta humb betejën e fundit.

ËSHTË LEHTË TË KRITIKOSH,

POR ËSHTË VËSHTIRË TË VEPROSH

( Shkruan: Behxhet Sh. SHALA - Prishtinë, 05. 08. 2011 )

Marrëveshja e Buhlerit, si biznesi i Trashlerit

Në shkrimin paraprak pata thënë se Borko Stefanoviq dhe Goran Bogdanoviq, si makro aktual të strukturave kriminale paralele serbe po luajnë lojën e cic’micit me komandantin e KFOR’it, gjeneralin Byhler dhe se i kanë bërë shylevek. Gjithashtu, isha i sigurt se gjenerali Byhler do t’i mësojë edhe do lojëra dhe se do t’i luaj ato lojëra sipas muzikës serbe! Ashtu edhe ndodhi! Serbët, në me krye cubat Stefanoviq dhe Bogdanoviq bllokonin rrugët kryesore duke grumbulluar trungje, rërë, gurë, si resurse të palëvizshme dhe bërllogun paramilitaro - parapolitik, si resurse lëvizëse! Bërthama e këtij bërllogu ishin ivanoviqët, janiqieviqët, ristiqët, jakshiqët dhe antonijeviqët, bandat paramilitare që kishin vrarë dhe masakruar civilë shqiptarë gjatë luftës çlirimtare dhe që e kishin vazhduar krimin edhe pas përfundimit të luftës! Sidomos në shkurt të vitit 2000 kur u vranë 11 shqiptarë dhe u shpërngulën me dhunë 13.800 shqiptarë dhe joserbë! Këta e vranë edhe Shefko Sallkoviqin, boshnjakun që e kishte vendosur në shtëpinë e tij flamurin e Republikës së Kosovës! Këta vranë edhe shumë shqiptarë të tjerë. Këta vranë edhe policë ndërkombëtarë! Kjo bandë vrau edhe Enver Zymberin, policin e ROSU si dhe plagosën disa policë të tjerë! Këta piromanë shovinist shkatërruan pikat kufitare 1 dhe 31. Shkatërrimin dhe kalljen e pikës kufitare 1 e përsëritën në ndërkohë që policia e EULEX’it ia mbathi për Serbi! Në barrikada grumbulluan gra, fëmijë dhe pleq! Paramilitarët shoqëronin Borkon dhe Goranin në ndërkohë që në ato diga bllokuese kishte edhe popa të Kishës Ortodokse Serbe. Popat e kësaj kishe bekonin paramilitarët e Arkanit në bazën e tyre në Erdut para se të fillonin “vallen e krimeve“ në Kroaci, Bosnje dhe në Kosovë! Popat e kësaj kishe bekonin edhe ata që vendoseshin në barrikadat e Borko Stefanoviqit dhe Goran Bogdanoviqit! Menaxhere kryesore e sistemimit në barrikada ishte një shtrigë bjonde e cila nga ballkoni i Gjykatës së Qarkut (e okupuar po nga këta paramilitarë), me flamur të Serbisë në dorë brohoriste “ovo je Serbija”. Më kujtohet se kur e sollën të prangosur në Prishtinë, sillej si Majka Jevrosima! Nuk i dëgjohej fare zëri! Pjesën veriore të Republikës së Kosovës e patën shndërruar në parajsë të krimit të organizuar. Në prani të policisë së UNMIK’ut, EULEX’it dhe KFOR’it! Në kartele të tipit të Medelinit të Kolumbisë nga koha e Pablo Eskobarit, në banda mafioze të Meksikos si dhe Sacra Corona Unita të Italisë (varianti më kriminal i mafias italiane)! Ndonëse ishte një dallim. Mafiozët në Kolumbi, Meksiko apo Itali burgoseshin ose vriteshin, në pjesën veriore të Republikës së Kosovës vetëm trasheshin! Vetëm shtoheshin! Të gjithë e dinin se çka po ndodhte në atë pjesë të Kosovës dhe të gjithë heshtnin. Ndërkombëtarët propozonin që me këta kriminelë të bëhej dialog. Që krimin e organizuar ta mbështjellin me forcë politike! Krimi i organizuar në këtë pjesë të Kosovës organizonte zgjedhje të Serbisë në Kosovë ndërsa pengonte organizimin e zgjedhjeve të Kosovës në Kosovë! Krimi i organizuar zgjidhte kryetarët e komunave si dhe tërë administratën paralele të Serbisë! Ndërkombëtarët u ndihmonin në organizimin e zgjedhjeve të Serbisë në Kosovë duke i siguruar me polici të tyre! Ndërkombëtarët mundësuan që policët serbë të Policisë së Kosovës t’i binden Beogradit dhe jo Prishtinës duke e këputur zingjirin komandues me Prishtinën dhe duke e trashur zingjirin komandues me Beogradin. Nuk e besoj se ka ndonjë vend në botë ku policia ka refuzuar punën në shtetin, uniformën e së cilit ka bartur thuaja për një vit dhe është paguar me rrogë duke punuar për shtetin që ka dashur dhe bën çmos ta shkatërrojë Kosovën. Ky shtet është Serbia! Ndërkombëtarët tërë kohën e bojkotit kanë qenë në anën e policëve të Sërbisë që kanë bartur uniformat e Policisë së Kosovës dhe janë paguar nga buxheti i Kosovës duke mos lejuar që ndaj tyre të merren masat e domosdoshme! Në shtetin e tyre këtë nuk do ta lejonin kurrë! Në shtetin e tyre kurrë nuk do të lejonin që forcat paramilitare të shtetit armik t’i vjelin doganat në formë të zhvatjes! Të vendosin ligjin e krimit mbi Kushtetutën e vendit! Në Kosovë e kanë lejuar këtë! Madje e kanë përkrahur duke biseduar me strukturat paralele të Serbisë! Ndërkombëtarët kanë lejuar që politikanët kosovarë, nga niveli i kryetarëve të komunave deri te posti ministror të përfitojnë miliona euro nga krimi i organizuar. E kanë lejuar bashkëjetesën e politikanëve të kriminalizuar dhe korruptuar kosovarë me krerët e krimit të organizuar mafioz serb, vetëm për të ruajtur situatën e sigurisë dhe për t’i hyrë në qejf regjimit të Serbisë! Duke marrë parasysh këtë bashkëdyzim, bashkëpunim dhe bashkëveprim të kriminelëve serbë dhe kosovarë, ndërkombëtarët janë kontribues në fuqizimin e këtij krimi! Po me këta kriminelë të strukturave paralele të Serbisë, gjenerali Byhler e lidhë Marrëveshjen tripikëshe e cila faktikisht e bënë situatën më të rëndë se para datës 25 korrik! Tash malli i Serbisë kontrabandohet si ndihmë humanitare! Prapë nuk ka kontrollim doganor të mallit, nuk ka doganierë dhe policë të Republikës së Kosovës! Çfarë përparimi ka këtu kur drejtor i “doganave“ bëhet Borko Stefanoviq ndërsa “doganierë“ dhe “policë” bëhen rojat e urës dhe kriminelët e barrikadave! Këtë që e ka bërë gjenerali Byhler në Kosovë nuk do ta duronin as pjesëtarët e fisit Zullu në Afrikën e shekullit 18’të! Për Kosovën dhe qytetarët e saj tri pikat e Marrëveshjes së Byhlerit i ngjajnë tri puthjeve ortodokse të grofit Drakulla! Duket, sipas të gjitha gjasave se këtë “marrëveshje“ në fakt e ka shkruar Tadiqi, e kanë përmirësuar Millan Jakshiqi dhe Oliver Ivanoviqi, është konsultuar Vojisllav Shesheli, postier ka qenë Borko Stefanoviq ndërsa e ka nënshkruar gjenerali Byhler! Pastaj, Hashim Thaçi e ka lexuar në media! Kjo “marrëveshje” dëmton shumë interesat dhe ardhmërinë e serbëve që duan të jetojnë në Kosovë! Sepse ata kanë mbetur në senduiç midis Tadiqit dhe Byhlerit! Politikanët tanë në rastin konkret janë krejt jashtë loje! Nëse hyjnë në lojë me këto rregulla të lojës, me këto tri pika e kanë të garantuar kartonin e kuq dhe diskualifikimin e përjetshëm nga fushëbeteja politike dhe kombëtare!

Konstruktiviteti dhe destruktiviteti

Pas 25 korrikut e patëm një reagim folklorik dhe euforik. Pikërisht si teneqja nga fabrika e falimentuar e llamarinës në Vushtrri! Për një kohë na bashkojë gjaku i dëshmorit Enver Zymberi. Neve duhet të na thyejnë kokën mirë e mirë që ta respektojmë njëri’tjetrin! Serbët nga asgjë hiçi krijojnë vlera. Ne vlerat e vërteta i bëjmë antivlera. Politikanët serbë sakrifikohen për shtetin ndërsa shumica e politikanëve shqiptarë sakrifikohen për pushtetin. Serbët e vranë Karaxhorxhin, Obrenoviqin, Drazha Mihajloviqin, Xhinxhiqin, Arkanin, Leginë etj. I lidhën dhe i dorëzuan në Hagë Millosheviqin, Millutinoviqin, Karaxhiqin, Mlladiqin dhe Haxhiqin kur e vlerësuan së është në interes të Serbisë. Vuk Jeremiqi e luan rolin e palaqos për interesa të shtetit të tij. Borko Stefanoviq, nga një qengj i butë u shndërrua në një derr të egër për interesa të Serbisë. Pra, këta vetsakrifikohen për Serbinë. Ndërkaq, tash po e sulmojnë Hashim Thaçin pse nuk e paska çliruar Mitrovicën ndonëse e dinë se edhe ata, po të ishin në pozitën e tij nuk do të bënin asgjë më tepër. Kam thënë botërisht se Hashim Thaçi është improvizues gjenial dhe pehlivan që ka mbijetuar të gjitha situatat deri më tani por që pashmangshëm do ta humb betejën e fundit. Mirëpo në këtë situatë Hashim Thaçi e meriton përkrahjen e plotë. Unë nuk jam i gatshëm që vetëm për ta hequr Hashim Thaçin nga skena politike t’i fus flakën Kosovës! Po e them gjithashtu se asnjë politikan në skenën politike kosovare aktuale nuk do ta menaxhonte më mirë situatën e krijuar! Këta politikanë që po e quajnë Thaçin sfilatist për të përfituar nga kjo situatë e kanë shumë gabim! Hashim Thaçit nuk po i rrezikohet posti i kryeministrit dhe zgjedhjet nuk janë në prag! Dhe këta nuk mund ta rrëzojnë Hashimin. Hashimin do ta shtrijnë për toke vetëm “sytë e ballit”. Është shumë e pamoralshme që në këto çaste t’i përmendet raporti i Dik Martit dhe të shantazhohet me këtë. Definitivisht gjërat kanë lëvizur dhe nuk do të kthehet gjendja e para 25 korrikut. Për momentin është edhe më keq por kjo nuk mund të zgjasë në infinit. Në fund të fundit, kush e ka ndaluar opozitën të organizojë protesta gjithëpopullore “për bashkimin e Mitrovicës”! Kurrë nuk ka qenë kohë më e përshtatshme dhe rast më i mirë! Pse nuk e kanë bërë? Përgjigjen gjejeni vet, lexues të nderuar. Për shumë gjëra nuk pajtohem me Hashim Thaçin mirëpo për këtë rast e vlerësoj se ka bërë një veprim të domosdoshëm. Dhe shumë të guximshëm. Dhe askush normal nuk mund ta mohojë patriotizmën e Hashim Thaçit dhe kontributin e tij në procesin e shtetbërjes së Kosovës. E ka hapur një shtegë të vogël në kënetën e krimit të organizuar në Mitrovicën e Veriut nga domosdoshmërisht, së bashku me ujin e ndotur do të shkojnë edhe kriminelët, serbë dhe shqiptarë! Filteri i drejtësisë dhe inkriminimi i tyre do ta përcaktojë përbërjen e “peshqve të mëdhenj” që do të kapen posa ta lëshojnë kënetën e krimit të organizuar! Është keq ndoshta që e them dhe tingëllon mbase edhe pesimiste por Hashim Thaçi sot nuk ka alternativë në Kosovë! Ose, ma gjeni cili është?! Hashim Thaçi do të jetë i fortë dhe ndjehet i fortë sepse e dinë shumë mirë se është i pazëvendësueshëm! Sepse po përkrahet nga dy “sytë e ballit”, Vashingtoni dhe Brukseli! Dhe, sepse i ka fituar zgjedhjet për dy mandate! Dhe se do t’i fitojë edhe në mandatin e tretë! Unë nuk e dëshiroj përfundimin e Hashim Thaçit edhe nëse më fusin në trezorin e Thesarit të SHBA. Kur e them këtë mos mendoni se e kam zbuluar Amerikën por po flasë nga përvoja e shteteve rreth nesh. Kemi shembuj shumë konkret. Shumë kam dëshirë të gaboj në këtë parashikimin tim. Nuk mund ta kenë të gjithë fatin e Millo Gjukanoviqit i cili ka mbijetuar falë rrethanave të caktuara. Propozoni alternativa si t’i ndihmojmë Republikës së Kosovës. Si ta forcojmë shtetin! Për ta shkatërruar e kemi shumë lehtë! Hashim Thaçi dhe çdonjëri prej nesh është i vogël karshi interesave të shtetit. Ne jemi vdekatarë të thjeshtë dhe kalimtarë të rastit në shtëpinë, kornizën apo hapësirën që quhet Republika e Kosovës e që unë do të doja të quhet Shqipëri! Kjo është dëshira por cilat janë mundësitë reale?!

BEHXHET SHALA

NATA E BARTOLOMEUT DHE DITA

E RRENAVE TË KULLUARA!

.