Konflikti i ngrirë, nuk ka brirë!

___________________________________________________________________________________________________________________________________________________________________________________________________

“STOMATOLOGU“ KRASNIQI

DHE “PACIENTI“ THAÇI!

Shkruan: Behxhet Sh. SHALA - Prishtinë, 8 korrik 2011

___________________________________________________________________________________________________________________________________________________________________________________________________

Foto: Florin Krasniqi dhe Hashim Thaçi para gazetarëve më 06.07.’11

Konflikti i ngrirë, nuk ka brirë!

Robert Galluçi, ish administratori i UNMIK’ut i Mitrovicës Veriore ( kryeqyteti i krimit të organizuar në pjesën e Republikës së Kosovës që adminstrohet nga Serbia) paksa i ka zbutur qëndrimet! Nga një Taliban i radikalizmit serb po përpiqet t’i zbus qëndrimet për këtë pjesë të okupuar të Kosovës duke u shndërruar në ofertues për zgjidhjen e problemit. Ofertën e tij politike e ka ambalazhuar sipas parimit të konkurrimit për tender, duke i paraqitur tri oferta. Të gjitha të dëmshme për Kosovën. E para ishte ndarja e Kosovës, si zgjidhje strategjike pasi të jenë qetësuar gjakrat. E dyta, që kjo pjesë e Kosovës e shndërruar në Kolumbi të shndërrohet në konflikt të ngrirë dhe, e treta që kjo pjesë e Kosovës sipas Ahtisari +, së bashku me komunat e decentralizuara serbe dhe ato që do të decentralizohen, zonat e mbrojtura dhe hilandarët e tjerë etnik serbë brenda Kosovës të fitojnë një status special, të bëhen si Alto Adixhe apo Tiroli Jugor, si Osetia, Brçko, Vukovari etj.etj. Me një fjalë, të gjindet një zgjidhje kreative për Veriun e Kosovës, strukturat e saj paralele në veri dhe metastazat e tyre brenda Kosovës! Ndamja e Kosovës do të ishte e pranueshme për serbët dhe Serbinë në një kohë më të përshtatshme (pasi të jetë integruar në BE, nëse i lejohet, natyrisht). Në kontekstin aktual politik dhe gjeostrategjik kjo do të ishte një vetvrasje apo hara-kiri për Serbinë dhe Serbia e ka lansuar ndarjen si balon provues përmes “irredentistit“ dhe “luftëtarit“ për Shqipëri të Madhe, shokut Ivica Daciq! Kjo ndarje nuk do të mund të lokalizohej vetëm në territorin e dëshiruar nga Serbia. Kjo ndarje hipotetike do të ishte fund i ëndrrave serbe për mitin e ortodoksisë serbe të identifikuara në Patrikanën e Pejës, Manastirin e Deçanit, Prizrenin si kryeqytet i Car Dushanit dhe do të nënkuptonte riverbërimin e Simonidës në freskat e kishës së Graçanicës. Edhe kësaj radhe nga vet serbët! Mundësia e dytë ose veriu i Kosovës si konflikt i ngrirë ishte argumenti me të cilin inkurajoheshin strukturat paralelel serbe dhe vet Serbia që të rezistonin integrimin e kësaj pjese të okupuar të Kosovës dhe njëkohësisht edhe si gogol me të cilin kërcënoheshin institucionet e Kosovës që të jenë të kujdesshme në ndërmarrjen e hapave për integrim të veriut. Në të kundërtën, ofronin perspektivën e shndërrimit të jugut, lindjes, perëndimit dhe qendrës së Kosovës në Veri të Mitrovicës dhe Veri të Kosovës! Kryegogoli ishte pikërisht Robert Galluçi, ky kryerebel serb, trajnues i rebelizmit dhe frymëzues i strukturave paralele serbe! Në aspektin strategjik mundësia e shndërrimit të Veriut të Kosovës në konflikt të ngrirë, as politikisht e as ekonomikisht nuk i levërdis as regjimit serb, vet Serbisë, Tadiqit, Oliver Ivanoviqit etj. U levërdis vetëm Robert Galluçit dhe Don Lamberto Zanier. Prandaj ndodhi edhe ky reflektim “pozitiv” i z.Galluçi. Në fakt, konflikti i ngrirë është përdorur si kërcënim, jo për të forcuar tezën për ndarjen e Kosovës dhe krijuar terren të përshtatshëm për ndarjen e saj por për të siguruar një status special për serbët e veriut përmes promovimit të projektit për kreativitet apo çasje ndryshe për trajtimin e këtij problemi dezintegrues për Kosovën. Strategjia për Veriun ka pasur kuptim dhe rëndësi për Kosovën për aq sa ka rëndësi mbarsimi artificial i arinjve polarë për Vatikanin! E kam fjalën te krijimi i kushteve për zbatimin e saj! Edhe ky ka qenë një balon provues dhe mashtrues, si për serbët ashtu edhe për shqiptarët! Karremi ka qenë aq joshës prandaj në këtë grep kanë rënë shumë analistë, qeveritarë (sipas detyrës zyrtare dhe joqeveritarë, sipas projekteve)! Për veten time ndjehem shumë i relaksuar sepse nuk kam fare dilema për fatin e veriut dhe enklavave! Nuk do të ketë fare ndarje e as ngrirje të konfliktit por shkrirje të raporteve përmes një projekti të zgjidhjes kreative të problemit në të cilën palët konfrontuese do të gjinden në një situatë sikur një i dehidruar në shkretëtirën e Saharasë të cilët në një ambient të fatamorganës e shohin një oazë me shumë gjelbrim dhe ujë në lokacion ku në 50 vitet e ardhshme nuk do të ketë reshje shiu! Për fatamorganistët institucionalë kosovarë oaza me gjelbrim dhe ujë do të shpërfaqen në formën e liberalizimit të vizave dhe proceseve tjera integruese! Sa më afër që duken ato, dehidrimi ynë është më i madh! Prandaj, Robert Kuper si një arbitër shumë i anshëm definitivisht nuk është oaza ku kosovarët mund ta shuajnë etjen. Aty vetëm mund të fitojnë një grusht me krip. Për të lëpirë më lehtë! Ate që e kemi pështyrë më herët! Asgjë më tepër!

Udhëzues turistik për vizitë Serbisë pas 1 nëntorit 2011

Një lajm i mirë për Kosovën, më në fund! Edhe qytetarët e Kosovës do të mund të lëvizin lirisht nëpër Serbi por jo edhe në pjesën Veriore të Mitrovicës! Si rezidentë të shtetit më të ri nuk do të detyrohemi të maltretohemi duke i bartur me vete pasaportat e Kosovës! Mjafton ta kemi lejen e njoftimit të Republikës së Kosovës. Deri te kufiri administrativ me Serbinë. Aty na i ndalin edhe lejet e njoftimit dhe na pajisin me do leje udhëtimi. Sikur çifutët në kohën e Hitlerit. Ose, sikur shqiptarët në kohën e Enverit! Vetëm ende nuk e di nëse ato leje të përkohshme do të detyrohemi t’i varim në qafë apo t’i vendosim në prapanicë si tabela të regjistrimit! Edhe ashtu nuk do të pranohen tabelat e RKS. Serbët mund t’i përdorin të gjitha tabelat e mundshme; të Millosheviqit, Koshtunicës, të Taqiqit, të Zanierit (KS) kur duan të hyjnë në Kosovë! Përdorimin e këtyre tabelave të regjistrimit mund ta shfrytëzojnë edhe qytetarët e Kosovës, pavarësisht përkatësisë etnike por nuk do të mund t’i përdorin këto tabelat e Bajram Rexhepit. Si alternativë mbetet ”modeli Nexhat Daci“. Mbulimi i këtyre tabelave me do tabela të Serbisë. Kështu pati vepruar edhe Daci. Fytyrat historike në muralet e Kuvendit të Kosovës i mbuloi me një stof të Mabetexit! Me një veprim “patriotik“ Daci pikturat e tipit socrealist i shndërroi në një kubizëm të Pablo Pakasos dhe Ibrahim Kodrës! Transformim artistik i paparë! Çështja e mbulimit apo zëvendësimit të tabelave është transformim apo më mirë të them deformim politik i paraparë! Republika e Kosovës tash po pajiset me regjistra civilë të fotokopijuar. Origjinali do të mbetet në Serbi, për shkaqe sigurie mbase. Kështu e kanë paraparë “lehtësuesi” Kuper, padroni Stefanoviq dhe zbatuesja Edita! Është e vërtetë se regjistrat janë të fotokopijuara ama është fotokopijim cilësorë! Larg, lexues të nderuar ka përparuar teknologjia! Sidomos ajo e fotokopijimit dhe mashtrimit! Mirëpo, mund të përballeni shumë lehtë që në kufirin administrativ me Serbinë të ndalohet Edita Tahiri dhe të mos lejohet të hyjë në Serbi. Arsyeja është shumë e thjeshtë; në regjistrat e fotokopijuar shkruan se personi në fjalë mund të jetë Edita Tahiri por se në regjistrat origjinal që i ka Serbia i njëjti person quhet Hajrije Beshiri! Kot përpiqet Edita t’i bind policët e Serbisë! Kot përpiqet ta thërras Borkon që t’i dali në ndihmë! Nuk je Edita Tahiri por Hajrije Beshiri dhe pikë! Sipas regjistrave origjinalë. Edhe për diploma. Paramendojeni situatën kur Agon Shipnisë që ka diplomuar në Republikën e Kosovës dhe tash jeton në trungun e Shqipnisë etnike në Preshevë certifikimin e diplomës t’i bëjë, si palë e tretë stërnipi i Nikolae Çausheskut, Dimitrie Çaushesku ndryshe trajnues i qenve në policinë e EULEX’it! Sipas konkluzioneve të Kuperit, edhe polici më i thjesht i EULEX’it ka kapacitet të plotë të certifikojë diplomat e shqiptarëve të Luginës së Preshevës. Me këtë është pajtuar Edita (Hajrie) Tahiri (Beshiri) ndërsa Borkos dhe Serbisë nuk i pengon asgjë! Konkluzionet e Ruperit nuk janë obligative për Borkon e Serbisë ndërsa e amnestojnë në të ardhmen E.H.T.B. e Republikës së Kosovës. Pas një kohe thjesht mund të thonë, edhe Thaçi, nëse nuk bëhet pjesë e karavanit të elefantëve se nuk ka pasur marrëveshje të nënshkruar prandaj: “marrëveshjet e nënshkruara mund të përdoren për kriminalizim ndërsa fjalët që i bartë era llogariten si fluturim”. Kështu: ”m’rrove, t’rrova, brisku i Kuperit (berberit)”.

Samanta Karavella dhe Andrea Kapusella

Çka kanë të përbashkët këta dy persona? Lotët. Po përpiqem të jap sqarime. Samanta Karavella, si garuese në “Ethet e së premtës“, pasi nuk e kalojë konkurimin e radhës shpërtheu në vaj. Ishte e vogël prandaj reagimi i saj ishte i natyrshëm. Andrea Kapusella ishte shef për çështje ekonomike në UNMIK dhe ICO. Sa ishte brenda, nuk bëzau fare. Kur e shkarkuan nga posti shpërtheu në vaj. Po ankohet në të gjitha anët. Mirëpo lotët e tij që dikush po i quan lot krokodili apo pendim post mortem i vuri në lëvizje, edhe EULEX’in, edhe ICO. Prokurorja e EULEX, pasi ka përfunduar mandatin ka ushtruar kallëzim në prokurori kundër Andrea Kapusellës për shpifje, etj.etj. E njëjta prokurore, Isabell Arnal ka qenë shumë flegmatike në luftimin e korrupsionit dhe krimit të organizuar në Kosovë. Duke mos bërë asgjë prej gjëje! More duhet të kem kujdes në opinionin tim ndaj Isabellës se po ma futë ndonjë kallëzim si “Kohës Ditore“! Andrea Kapusella ka vepruar në mënyrë tipike shqiptarqe. Vetëm pasi i është rrezikuar statusi material, ai ka nxjerrë jashtë rrobat e palara të UNMIK’ut, ICO dhe EULEX’it! Megjithatë, mirë ka bërë! Ka dëshmuar se mafia në UNMIK, ICO dhe EULEX nuk është ndonjë shoqatë bëmirësie por në disa aspekte është më e sofistikuar se vet Cosa Nostra! Gjithmonë kam shkruar se koka e korrupsionit dhe krimit të organizuar është te ndërkombëtarët ndërsa pipëzat për ekzekutim janë te vendorët. Kjo më ka kushtuar dhe po më kushton sepse kam denoncuar zbatimin e agjendave personale të ndërkombëtarëve të maskuar me agjenda shtetërore të vendeve nga kanë ardhur!

Diçka për titullin

Hashim Thaçi është kryeministër aktual i Republikës së Kosovës dhe mik i madh i Behgjet Pacollit. Është pehlivan i madh i skenës politike. Nëse një pjesëtar i njësive speciale të ushtrisë britanike demonstron se si mund të mbijetohet në kushte ekstreme të vështira, Hashim Thaçi mund të ligjërojë se si mund të mbijetohet në të gjitha situatat politike! Së paku deri më tani! Prandaj, konsideroj se opozita në përgjithësi dhe opozita brenda PDK po bëjnë përpjekje të Sizifit për ta detronizuar. Kafshimi i Gjarprit mund të shërohet vetëm me serumin që është në fakt helm i gjarprit! Hashim Thaçin mund ta hudhë në shpinë vetëm Hashim Thaçi! Hashim Thaçi ka shije për veshje dhe dhëmbë të shëndoshë andaj mund të jetë reklamues perfekt i pastave për dhëmbë më të njohura në botë! Nuk mbetet pa idare!

Florim Krasniqi është amerikan me prejardhje shqiptare. Ka jetuar dhe jeton në shtetin që e sundon botën dhe i cili i përcakton rregullat e lojës në aspektin global! Tash është deputet i Parlamentit të Kosovës por e përdor një fjalor sikur Omar el Bashiri në Sudan apo Idi Amini në Ugandë! Është një fjalor shumë fyes, diskreditues dhe kërcënues. Me plot mllef dhe urrejtje. Kam lexuar një libër ku ai ka deklaruar se ka falimentuar në Amerikë pasi ka investuar miliona euro në ndihmë luftës së UÇK’së. Disi, varianti modern amerikan i Hasan Prishtinës dhe Haxhi Zekës. Kam pritur që Florim Krasniqi do ta bartë kulturën demokratike amerikane në Parlamentin e Kosovës. Jo, fjalorin e Gazimestanit. Florim Krasniqi edhe tash po e dëshmon se nuk mund të jetë biznesmen i suksesshëm. Në vend që të përfitojë nga dhëmbët e shëndoshë dhe të bukur të Hashim Thaçit si biznismen që është, ai dëshiron t’i thyej dhëmbët Hashimit. Prej këtij “biznesi” të Florim Krasniqit mund të përfitojnë vetëm Ngadhnjim Domi apo Luan Hoxha si dhe ndonjë kompani e sigurimeve dhe kurrsesi Florim Krasniqi! Florim Krasniqi dhe disa biznesmenë amerikanë me prejardhje shqiptare duhet të respektojnë Kosovën dhe të puthin në faqe Hashim Thaçin, Ramushin dhe disa politikanë të tjerë sepse në Amerikë kanë qenë milionerë vetëm në detyrime (borxhe) ndaj shtetit, ndërsa milionerë të vërtetë janë bërë në Kosovën e pasluftës, duke përfituar nga tenderët dhe privatizimi. Kartonin jeshilë për këtë ua kanë dhënë pikërisht Hashimi të cilin po donë me e lënë pa dhëmbë, me duda pra, Ramushi dhe politikanë të tjerë! Ndonëse dikush nga ne edhe mund ta ketë dashur Enver Hoxhën, megjithatë nuk po kullosim barë! Prandaj, komenti im është: ”shumë poshtë ka ra katundi kur çdokujt që i ç…., të shtinë përfundi”!

SHTOJCË E PASHTRIKU.ORG

„Pullazxhiu“ i Amerikës - Florin Krasniqi, aktualisht deputet i Lëvizjes Vetëvendosje, të mërkurën (më 06.07.2011) gjatë një konference për medie të mbajtur para Gjykatës Komunale në Prishtinë, ka deklaruar se është i gatshëm për ballafaqim direkt me Hashim Thaçin, madje edhe të ia thyej dhëmbët. “Unë po du që problemin me të ta zgjidh me drejtësi, por ka edhe forma tjera që unë nuk po i du ato. Unë muj me dal me ja thy edhe dhomt. E meriton. Jo që nuk muj edhe nuk guxoj, dhe jo që se meriton ai edhe banda e tij, por kjo nuk është drejtësi”, ka deklaruar Florini para gazetarërve. Kryeministri Hashim Thaçi nuk e ka fort dert gjendjen e dhëmbëve të tij, por i shqetësuar është shprehur me “fjalorin joshqiptar” të deputetit të Vetëvendosjes, Florin Krasniqi. Pas një mbledhjeje të qeverisë, ai ka takuar gazetarët ku ka thënë se fjalori i Krasniqit nuk ka të bëjë me traditën shqiptare dhe as me kulturën politike. Florin Krasniqi ka kërkuar që rasti i tij i padisë ndaj kryeministrit Thaçi të merret nga vendorët, e jo nga ndërkombëtarët. Ai, ka ngritur padi në Gjykatën Komunale të Prishtinës ndaj kryeministrit Hashim Thaçi, duke e akuzuar për shpifje kundër tij dhe familjes së tij. Ky vendim i Krasniqit erdhi si kundërpërgjigje ndaj akuzave, të cilat ia ka adresuar ndaj tij Partia Demokratike e Kosovës me 5 nëntor të vitit të kaluar, përmes një komunikate të publikuar në media. Në padinë, e cila përfshin gjithsej 14 pika, Krasniqi ka theksuar se akuzat të cilat i janë vënë përsipër atij nëpërmjet komunikatës në fjalë, sipas tij, janë shpifje dhe fyese për të dhe familjen e tij. (Moderatori i pashtriku.org - 08. 07. 2011)

Lexoni padinë e Florin Krasniqit:

PADI PENALE KUNDËR HASHIM THAÇIT

.

BEHXHET SHALA:

NJERËZOR.., KOMBËTAR.., SHQIPTAR DHE KOSOVAR!

.