Ekonomi

KEK’u HUMB MILIONA NË “FERRONIKEL”!

Shkruan: Parim Olluri - Prishtinë, 04. 03. 2010

Foto: Ndërmarrja “Ferronikeli”

Për 1 milion euro e gjysmë është dallimi në faturim për rrymën që shpenzon ndërmarrja “Ferronikeli” në muajt dhjetor të vitit të kaluar dhe janar të këtij viti, shkruan sot “Koha Ditore”. Por, dallimet janë vetëm në faturim të rrymës që bëhet nga Korporata Energjetike, ndërsa konsumatori i saj i privilegjuar “Ferronikeli” ka bërë përafërsisht shpenzimet e njëjta në këta dy muaj.

Në kalkulimet që janë bërë për muajin dhjetor në bazë të rekomandimeve të Zyrës së Rregullatorit për Energji (ZRrE) vlerësohet se energjia e shpenzuar në tarifën e lartë (kwh) - në dhjetor ka qenë 32 milionë e 838 mijë kilovat’orë energji elektrike, në tarifën e ulët ka qenë mbi 20.019.942 kilovat. Energjia totale e shpenzuar ka qenë 52.58,914 (kwh), ndërsa fuqia maksimale e angazhuar në dhjetor ka qenë rreth 76 mijë e 840 megavat energji elektrike.

Për këto shpenzime ndërmarrja “Ferronikeli”, sipas dokumenteve që ka siguruar gazeta, është obliguar të paguante rreth 3 milionë e 101 mijë euro, plus TVSH-në 465 mijë euro, ashtu si ka paguar në dhjetor 2009. Kurse, në muajin e parë të vitit 2010 për të njëjtat shpenzime si në tarifën e lartë si dhe atë të ulët kjo ndërmarrje ka paguar 2 milionë e 74 mijë euro me TVSH. Po ashtu, fuqia maksimale e angazhuar në muajin janar ka qenë 76 mijë e 840 kilovat energji elektrike. Edhe shpenzimet në tarifën e lartë në janar kanë qenë rreth 32 milionë (kwh) që janë përafërsisht të njëjta me muajin e fundit të vitit 2009, ndërkohë që edhe shpenzimet në tarifën e ulët kanë qenë afro 20 milionë kilovat-orë energji elektrike.

Arten Bajrushi, zëdhënës në ndërmarrjen “Ferronikeli”, ka theksuar se kompania ku ai punon nuk mund të bëjë publike asgjë në lidhje me këtë rast pasi është biznes privat. Adresa ku mund të bëhen publike për opinion këto shifra, sipas Bajrushit, është Korporata Energjetike e Kosovës. Në këtë korporatë theksojnë se qëndron e kundërta. Vlera në euro për muajin janar është 15.6 për qind më e lartë se ajo e muajit dhjetor. “Kjo rritje vjen pas kërkesës më të madhe për energji elektrike dhe për fuqi maksimale më të madhe të angazhuar”, ka theksuar Viktor Buzhala, zëdhënës në KEK.

Sipas tij, fuqia maksimale e angazhuar (kw) në dhjetor ka qenë 73.101, ndërsa në janar ka qenë 76.841 (kw). Kurse energjia e shpenzuar në muajin e fundit të vitit 2009 ka qenë 48.084.766 kwh, kurse në muajin e parë të vitit 2010 ka qenë 52.858.914 kwh. Ndërmarrja “Ferronikeli” së bashku me “Sharr Cem”, “Trepçën” dhe “Birrarinë e Pejës”, futen në grupin e konsumatorëve të privilegjuar të Korporatës Energjetike. 

Çmimi sipas kontratave që kanë me Korporatën Energjetike këta operatorë ekonomikë është 0.03 centë për një kilovat-orë energji elektrike. Për sa i përket “Ferronikelit”, në të kaluarën drejtuesit e Korporatës Energjetike shpeshherë patën ngritur çështjen e shkëputjes së kontratës me këtë ndërmarrje për shkak të humbjeve që shkaktoheshin nga çmimi trefish më i lirë sesa me operatorët e tjerë ekonomikë.

PARIM OLLURI: DAMIR FAZLIQ FITON MILIONA EURO PREJ KEK’ut!