Një marrëveshje që dëmton Kombin Shqiptar

MARRËVERSHJA UJORE ME GREQINË, CËNON

EDHE HAPËSIRËN AJRORE

Shkruan: Tedi Blushi - Tiranë, 12. 01. 2010

Shikoni: Athina merr detin, Shqipëria jashtë rrugëve të gazit!

Cenimi i sovranitetit edhe nga ajri!

Marrëveshja e përcaktimit të kufirit detar me Greqinë e cenon sovranitetin territorial të Republikës së Shqipërisë jo vetëm në det, por edhe në hapësirën e saj ajrore. Shteti shqiptar, në bazë të së drejtës ndërkombëtare e njeh “kufirin” si vijën ndarëse që përmbledh rrafshin vertikal të hapësirës tokësore, ajrore, detare dhe nëntokësore. Por, fqinji ynë jugor nuk e njeh këtë parim. Greqia mban ende në fuqi dekretin me numër 6/18 të vitit 1931, që përcakton shtrirjen e hapësirës së saj ajrore 4 milje përtej hapësirës detare. Deri më tani, Athina zyrtare nuk ka bërë të ditur asnjë qëndrim se dekreti 6/18 i vitit 1931 nuk zbatohet në kufirin detar shqiptaro-grek. Ndërkohë që edhe negociatorët e palës shqiptare kanë preferuar të mos e sqarojnë paraprakisht këtë çështje, para miratimit përfundimtar të marrëveshjes detare. Është e vërtetë që Shqipëria e ka eliminuar flotën e saj ajrore. Por kjo nuk do të thotë që vendit t’i cenohen të drejtat sovrane që burojnë nga hapësira ajrore shqiptare, sikundër janë tarifat e fluturimit në korridorin ajror të Kanalit të Otrantos, që është shumë i trafikueshëm.

Judge Advocate General

Referuar faqes zyrtare në internet të Zyrës Juridike të Marinës Amerikane, www.jag.navy.mil, Shtetet e Bashkuara të Amerikës disa herë kanë ndërmarrë veprime që kundërshtonin dekretin me numër 6/18 të Greqisë për zgjerimin me 4 milje të hapësirës ajrore përtej asaj detare. Në vitet 1983, 1984 dhe 1985, SHBA i kanë dërguar Athinës zyrtare nota proteste për këtë çështje. Ndërkohë që Turqia e kryen këtë gjë pothuajse përditë. Ndaj dhe efekti i dekretit grek të 1931-it në marrëveshjen detare Shqipëri-Greqi mund të cenojë marrëdhëniet dypalëshe të Shqipërisë me dy vende me rëndësi strategjike për ne, sikundër janë SHBA-të dhe Turqia. Kjo pasi me heshtjen e Shqipërisë, marrëveshja e përcaktimit të kufirit detar me fqinjin tonë jugor nënkupton mbështetjen ndaj qëndrimit grek dhe kundërshtim të qëndrimit amerikan dhe atij turk për mosnjohjen e kufirit ajror përtej atij detar.

Gjykata Kushtetuese

Gjykata Kushtetuese përfundoi në datën 8 dhjetor, pas një seance maratonë që zgjati rreth 7 orë, shqyrtimin e kërkesës ankimore të Partisë Socialiste për marrëveshjen e kufijve detarë me Greqinë. Ka qenë hera e parë në historinë e këtij institucioni dhe të shtetit shqiptar, që një marrëveshje ndërkombëtare i është nënshtruar shqyrtimit gjyqësor. Gjithashtu, ka qenë hera e parë në historinë e kësaj gjykate që një shqyrtim gjyqësor ka zgjatur në një seancë kaq të gjatë. Pas dëgjimit të palëve, ajo çka vlen të theksohet është se me gojën e përfaqësuesve të qeverisë janë pranuar më në fund të gjitha shkeljet ligjore që fsheh kjo marrëveshje, të cilat për 9 muaj me radhë janë denoncuar nga “Gazeta Shqiptare”. Por, pavarësisht këtij fakti, Gjykata Kushtetuese ka preferuar të mos shprehet menjëherë për këtë çështje dhe as të bëjë publike një datë se kur do ta bëjë këtë

STOP RATIFIKIMIT TË MARRËVESHJES,QË CËNON SOVRANITETIN E SHQIPËRISË!