Reagim i KMDLNj’së

Këshilli për Mbrojtjen e të Drejtave e të Lirive të Njeriut

Council for the Defence of Human Rights and Freedoms

Rr. Nëna Terezë nr. 24/2 – I/I, Prishtinë-Kosovë; tel. 381 (0) 249006 fax: 381 (0) 38 244029

E-mail: kmldnj.cdhrf@gmail.com - http://www.cdhrf.org

KËRKONI FALJE PUBLIKE ZOTI AMBASADOR!

Foto: „Mendjendrituri“ Kristofer Dell!!!

“Të gjithë ata që janë kundër privatizimit të PTK-së janë nostalgjikë për të kaluarën (mbase për ish’Jugosllavinë!), komunistë, robër të njëmendësisë, kundërshtarë të ekonomisë së tregut, partizanë të së kaluarës të cilët ruajnë ndjenja të nostalgjisë për socializmin e Luftës së Ftohtë dhe të kohës së Jugosllavisë, konspirativë etj.etj.”. Këto janë vetëm një pjesë e cilësimeve diskualifikuese që i bënë Ambasadori i SHBA’ve në Kosovë z. Kristofer Dell të cilat u adresohen atyre që nuk pajtohen me mënyrën siç mendohet të privatizohet PTK’ës e që nuk do të thotë se janë kundër procesit të privatizimit.

Këto cilësime diskualifikuese të Ambasadorit Dell u drejtohen shoqërisë civile në radhë të parë dhe OJQ’ve që nuk janë në valë të njëjta me qëndrimet e z. Dell por nuk janë të përjashtuar as subjektet politike, parlamentare dhe joparlamentare! Të cilësohesh se je nostalgjikë për ish’Jugosllavinë në kohën kur dihet për vuajtjet që qytetarët e Kosovës, shqiptarët në veçanti kanë pësuar pikërisht nga ai regjim është jodemokratike dhe johumane! Të qenit komunistë nuk nënkupton menjëherë se jeni njeri i keq sikur se deklarimi se jeni demokrat nuk nënkupton se jeni njeri i mirë dhe vërtet demokrat! Për qytetarët e Kosovës, shqiptarët në radhë të parë është fyerje nëse në çfarëdo konteksti ndërlidhen me komunistët jugosllavë sepse të gjitha krimet ndaj shqiptarëve janë bërë në emër të këtij komunizmi! Prandaj është i tepërt dhe jo i drejtë cilësimi diskualifikues i Ambasadorit Dell.

Z. Dell është përfaqësues i një shteti ku liria e fjalës, shprehjes së mendimit të lirë dhe të drejtat e njeriut janë fundament mbi të cilat ndërtohen të gjitha vlerat tjera të një shoqërie të vërtetë demokratike ndërsa mënyra se si sillet në Kosovë është pikërisht e kundërta e saj! Me këmbënguljen e tij që me çdo kusht të privatizohet PTK sipas sistemit knock-out, shpejt e shpejt, Ambasadori Dell tregon qartë se interesimi i tij kalon më shumë në sferën personale! Prania e tij, në çdo vend dhe në çdo kohë, për dallim nga ambasadorët tjerë dëshmon qartë qëllimin e tij që çdo gjë dhe çdo proces të konsiderohet si pronësi e tij.

Me praninë e vet edhe në vendet jashtë mandatit të tij, me presionin që u bënë politikanëve për procese të caktuara politike e sidomos trysnisë për privatizimin e pronave publike, Ambasadori Dell është frenues i proceseve demokratike në Kosovë. Me akuzimin dhe diskualifikimin e shoqërisë civile në Kosovë, Ambasadori Dell është pengues i zhvillimit dhe forcimit të shoqërisë civile si parakusht për ndërtimin e një shoqërie demokratike! Me akuzat dhe përpjekjet për ngulfatje të lirisë së fjalës dhe lirisë së medieve, Ambasadori Dell është shembull tipik i një nostalgjiku për ish Jugosllavinë dhe mendësinë komuniste!

Për këtë arsye shefat e z. Dell duhet ta shqyrtojnë punën e tij në Kosovë, fjalorin jodiplomatik që e përdorë duke i kërcënuar ata që nuk mendojnë si ai dhe arsyet pse është në marëdhënie të padurueshme me shoqërinë civile në Kosovë! Pse e injoron shoqërinë civile! Në fund të fundit, Postë Telekomi në SHBA dhe Britani të Madhe është pronë publike (shtetërore) dhe nuk privatizohet në asnjë mënyrë! Kemi shumë shembuj që shumë privatizime që janë bërë në shtetet në transicion nuk kanë qenë të suksesshme dhe janë shndërruar thjeshtë në mundësi të shkëlqyeshme të përfitimit për politikanët ndërkombëtarë me ndikim.

Ambasadori Dell nuk e ka dhënë as kontributin më të vogël për luftimin e korrupsionit në Kosovë dhe angazhimi i tij ka qenë krysisht në planin deklarativ. Në planin praktik e ka penguar ate luftë! Për këtë arsye bashkëpunimi ka qenë dhe është i pamundur deri sa Ambasadori Dell ta ketë këtë qëndrim.

Mirëpo, para se të largohet nga Kosova dhe sinqerisht shpresoj se kjo ditë nuk është larg, Ambasadori Dell e ka për obligim t’i kërkojë një falje publike shoqërisë civile në Kosovë dhe OJQ’ve që nuk kanë qenë në një mendje me të, të cilët i ka diskualifikuar me një fjalor që nuk i përket një diplomati dhe të cilat i ka diferencuar sipas kritereve të dëgjueshmërisë apo padëgjueshmërisë! Demokracia shndërrohet në diktaturë nëse konsiderohet e drejtë ekskluzive e një personi që vet i përcakton kriteret dhe përmbajtjen e saj!

Shërbimi për Informim i KMDLNJ’së

Prishtinë, 28. 10. 2010

BEHXHET SH.SHALA:

NJË ANALFABET, PËR PRESIDENT!

…