Skandaloze

Sarajevë: Arrestohet, Damir Fazlliç konsulenti boshnjak i kryeministrit Sali Berisha

· Është arrestuar në Sarajevë në Bosnje Damir Fazlliç, biznesmeni boshnjak, i cili njihet mjaft mirë nga qarqet e qeverisë shqiptare. Ndryshe, Fazlliç njihet edhe si kontaktet konsulencës me kryeministrin Berisha dhe person me lidhje të forta me njerëzit kryesore të PD-së, madje ortak biznesi me të afërm të një prej ministrave kryesore të kabinetit Berisha.

Kush është Damir Fazlliç

Foto: Damir Fazlliç

Damir Fazlliç është lindur në vitin 1975 në Vishegrad. Në një artikull të shkruar pak kohë më parë nga gazeta "Slobodna Bosnia", në vitet '90 ai emigroi me familjen në Londër, ku u vu në kontakt më pas edhe me Xhorxh Barsbi-n, një agjent londinez i MI6-ës, i cili më pas u vendos në Ambasadën e Mbretërisë së Bashkuar në Beograd.

Sipas kësaj gazete, Fazlliç i shfrytëzoi lidhjet e tij angleze për të fituar miqësinë e njerëzve të pushtetshëm në Beograd si Vuk Jeremiç apo Boris Tadiç. "Një prej arritjeve të tij të para si një përkthyes në moshë të re, ishte shitja e Telekomit serb dhe e kompanisë "NATWEST", ndërsa negociatat u kryesuan nga ish-Sekretari anglez për Marrëdhëniet me Jashtë, Dagllas Hërd. Më tej kjo gazetë ka paraqitur edhe të dhëna të tjera lidhur me një numër të madh operacionesh financiare, ku Fazlliç ka lënë gjurmët e tij. Tregtia e armëve dhe privatizimet duket se kanë qenë ushqimi i preferuar i Fazlliç, ndërsa "Slobodna Bosnia" shkruan se, "sipas disa burimeve ai është një ndër njerëzit më të korruptuar me më shumë lidhje dhe nga më intrigantët në Ballkan".

Kjo gazetë thekson dhe aktin se Damir Fazlliç ka një lidhje të trashëguar miqësie familjare me Jovica Stanisiç. "Fazlliç kishte "rekomandime të mira" nga Stanisiç si pasojë e miqësisë së hershme mes Stanisiç dhe së ëmës së Fazlliç, Jovanka", - shkruan "Slobodna Bosnia", e cila edhe njëherë nxjerr në pah lidhjet e fuqishme të Damir Fazlliç me klanin e Millosheviçit, duke qenë se Stanisiç ishte numri 2 i pushtetit të kohës së Millosheviçit.

Pas tragjedisë së Gërdecit në Shqipëri, emri i Fazlliçit u përmend nga disa media shqiptare edhe si ndërmjetësi mes MEICO-s dhe shoqërisë së Diverolit për tregtinë e fishekëve në Afganistan. Ndryshe, Fazlliç konsiderohej prej koshësh si mjaft i dyshuar për shkak të bizneseve të shumta ndërmjetësuese. Vënia në pranga e tij është bërë pasi është vënë nën akuzë për shantazh financiar. Ai ishte një person i kërkuar dhe hetuar në disa vende të botës. Fazlliç është i njohur në vendin tonë për lidhjet e tij me qeverinë shqiptare, veçanërisht me partinë Demokratike.

Gjatë vitit 2005, Damir Fazlliç ishte ndërmjetësi kryesor për lidhjen e kontratës mes Partise Demokratike dhe kompanise BJR, e cila ishte konsulentja zyrtare e kësaj partie në fushatën elektorale. Pas fitores së kësaj partie në zgjedhjet elektorale, Fazlliç filloi të bëhej gjithnjë e më shumë i pranishëm në Shqipëri dhe sipas burimeve të medias ai ka qenë ndërmjetësi kryesor për të sjellë në vendin tonë shumë firma të cilat janë marrë kryesisht në fushën e ndërtimeve. Ndër të tjera edhe shtypi serb e ka cilësuar Fazlliç si një kontrabandist ndërkombëtar të shumë aktiviteteve, nga cigaret, armët dhe duke vendosur lidhje politike të ngushta në Ballkan. Gjithashtu, ai konsiderohet si një nga të dyshuarit për urdhërimin e vrasjes së ish kryeministrit serb, Gjingji.

Sipas mediave serbe arrestimi i tij do të pasohet edhe me arrestime të tjera. Fazlliç ka qenë edhe në listën e të akuzuarve të Hagës, por më pas u lirua nga këto akuza. Serbo-boshnjaku, akuzohet për shantazh financiar, ishte një person i kërkuar dhe hetuar në disa vende. Gjatë vitit 2005, Damir Fazlliç ka qenë ndërmjetës për lidhjen e kontratës mes Partisë Demokratike dhe kompanisë BJR, e cila ishte konsulentja zyrtare e kësaj partie në fushën elektorale, zëdhënës i të cilës ishte ministri aktual i jashtëm Lulzim Basha. Gjithashtu, ai ka qenë ndërmjetës për të sjellë në Shqipëri shumë firma të cilat janë angazhuar kryesisht në fushën e ndërtimeve. Fazlliç rezulton të jetë ortak në katër biznese në Shqipëri. Mediat serbe e kanë cilësuar Fazlliç si një kontrabandist ndërkombëtar të shumë aktiviteteve, nga cigaret, armët dhe deri tek influenca politike.

Arrestimi

Damir Fazlliç, është arrestuar mbrëmjen e së premtes në Sarajevë në Bosnje së bashku me një person tjetër. Disa ditë më parë edhe në shtypin shqiptar u botuan për ditë me rradhë citime, lidhur nga një hetim që po zhvillohej në Sarajevë kundër biznesmenit Fazlliç si dhe lidhjeve të tij me kryeministrin Berisha dhe njerëz të afërt të tij. Mediat serbe raportojnë se Fazlliç u arrestua në operacionin për kapjen e komandantit mysliman të luftës në Bosnje Naser Oriç. Fazlliç rezulton të ketë biznese në Shqipëri. Fazlliç është njëri ndër tre personat që u arrestuan mbrëmjen e së premtes në kuadër të një operacioni të ndërmarrë nga policia federale e Bosnje Hercegovinës.

Mes 3 emrave të arrestuar është dhe komandanti mysliman në Srebrenicë Naser Oriç i cili akuzohet nga Gjykata Ndërkombëtare e Hagës për krime lufte. Operacioni ishte urdhëruar nga Prokuroria e Sarajevës. Prokuroria kantonale e Sarajevës zhvillonte dy hetime kundër Damir Fazlliç, pronarit të firmës "European Finance" dhe konsulentit financiar, me dyshimin për mashtrime financiare dhe shpërdorim. Këtë e ka konfirmuar Branko Shlivar, kryeprokurori kantonal. "E kemi në përpunim lëndën që ka të bëjë me Damir Fazlliç, ndërkaq bëhet fjalë për rastet e firmës "AC European Finance" dhe "Capital Investment Menagment Corporation".

Duke pasur parasysh se në rastin e këtyre firmave bëhet fjalë për firma fiktive, hetimet i kemi hapur kundër dy personave fizikë, përkatësisht shtetas të Bosnjës dhe shtetasve të Britanisë së Madhe, për shkak të veprës penale të mashtrimit", - thuhet në deklaratën me shkrim të kryeprokurorit kantonal. Sipas rezultateve të deritanishme të hetimeve, Damir Fazlliç në emër të "European Finance" nga Sarajeva ka marrë nga Enti Federal për Punësim që në vitin 1999, 25.000 KM (Konvertibilna Marka është monedha e Bosnjës, 1 euro = KM 1.95583), ndihmë për ndërtimin e hotelit "Rogner" në Sarajevë. "Ky hotel duhej të ndërtohej nga një kompani austriake, kurse Damir Fazlliç në cilësinë e konsulentit duhej të merrte pjesë në të gjitha punimet. Fazlliç duhej të ndihmonte për punësimin në këtë hotel të 100 punëtorëve. Hoteli nuk u ndërtua asnjëherë, punëtorët nuk u punësuan, kurse Enti Federal i Punësimit 25.000 KM i shndërroi në një hua pa kthim për Damir Fazlliç", - thuhet në raportin e prokurorisë kantonale të Sarajevës.

Media i referohet dy të arrestuarve të tjerë, (bashkë me Naser Oriç), njëri me emrin Nedim Sahimpasiç dhe një person tjetër i njohur me pseudonimin "Sëitch" me kombësi serbe. Tre të ndaluarit dyshohen për aktivitete të ndryshme kriminale ku përfshihet dhe përgatitja e disa qindra mijëra vulave boshnjake. Emri i Fazlliç është i lidhur me një numër skandalesh jo vetëm në Bosnje Hercegovinë por edhe në Serbi, Kroaci, dhe Shqipëri.

(Pashtriku.org – 06. 10. 2008 )