Fenomeni “Fazlliç”

SEKSERI FAZLLIÇ PËR 3 VITE FITOI 50 MILIONË

DOLLARË NË SHQIPËRI!

· Damir Fazlliç ishte i angazhuar fuqimisht në fushatën elektorale të 2005 në ndihmë të Partisë Demokratike, duke ndihmuar ndër të tjera në mbledhjen e fondeve dhe në ndërmjetësimin për konsulencë ndërkombëtare.

· Qeveria e favorizoi aq shumë sa që ai brenda 3 vitesh deklaroi një pasuri prej rreth 50 milionë dollarë të fituara në Shqipëri, ndërkohë që nuk i pagoi asnjë obligim tatimor shtetit shqiptar. Këto favore i fitoi sepse ishte mik me njerëz të pushtetshëm, si Berisha dhe Basha, madje vajzën e të parit me Argita Malltezi-Berisha e kishte përfaqësuese ligjore të kompanive të tij fantome, ndërsa kunatin e të dytit administrator të bizneseve të tij.

Shkruan: Arben Muhameti - Prishtinë, 08. 12. 2008

__________________________

Mjaftoi arrestimi dhe ndalimi në Bosnjë i biznesmenit serbo-boshnjak Damir Fazlliç me akuzën për shantazh financiar dhe evazion fiskal që të ngritën tensionet në Tiranë! Opozita në fakt qysh në vitin 2005 ka përmendur lidhjet e Berishës me serbo-boshnjakun, mirëpo në atë kohë akuzat e opozitës nuk gjetën jehonë edhe aq të madhe.

Arben Rrozhani: Bizneset e serbëve Fazlliç-Mishkoviç në Shqipëri pas ardhjes së Sali Berishës në pushtet

Flet Damir Fazlliç: Berisha miku im

Fazlliç për 3 vite fitoi 50 milionë dollarë në Shqipëri!

Ndërsa tani, kur Shqipëria po hyn në vitin elektoral arrestimi në Bosnje ishte një pretekst i mjaftueshëm për të shprehur gjithë ato që dinin mediat dhe opozita në lidhje me fenomenin “Fazlliç”. Dhe doli se çështja nuk është edhe aq e thjeshtë por ndërlidhet me shumicën e ngjarjeve korruptive dhe skandaloze që kanë ndodhur në Shqipëri këto vitet e fundit. Damir Fazlliç ishte i angazhuar fuqimisht në fushatën elektorale të 2005 në ndihmë të Partisë Demokratike, duke ndihmuar ndër të tjera në mbledhjen e fondeve dhe në ndërmjetësimin për konsulencë ndërkombëtare.

Pak muaj pas marrjes se pushtetit nga PD, ai krijoi brenda 3 ditësh 5 kompani, që në fakt asnjëherë nuk ushtruan veprimtari ekonomike, por u shfrytëzuan për pastrimin e parave dhe gëlltitjen e fondeve publike, duke marrë tenderë të vlefshëm dhjetëra milionë dollarë për furnizim me rrymë të vendit me prokurim të drejtpërdrejtë, duke shkelur të gjitha kriteret ligjore dhe duke i dhënë tenderët pikërisht këtij, pavarësisht se përveç tjerash ofronte një çmim 30 për qind me të shtrenjtë se çmimi i tregut. Fitoi tenderë poashtu tepër të vlefshëm si ndërmjetësues i një serë kompanish serbe dhe të huaja në punimet e autostradës Durrës - Morinë. Pastaj bleu disa hektarë tokë me çmim shumë të volitshëm në Porto-Romano, dhe befas vlera e truallit të tij u rrit për 50 herë, sepse Qeveria vendosi që pikërisht aty të jepte lejen dhe të investonte për një Termocentral duke i blerë tokën Fazlliqit.

· VOA: Fatos Lubonja analizon çështjen Fazlliç

Shtrohet pyetja në kushte normale sa do të ishte probabiliteti që të ndodh një gjë e tillë? Pra, që aty ku ti blen pronë si me ngut me çmim shumë të lirë dhe me një pozicion aspak strategjik, qeveria të vendos të investojë disa qindra milionë. Kjo i mundësohej vetëm atij, sepse ai paraprakisht kishte informacionin nga qarqe të larta se duhej te blinte aty, që ata ti blinin atij ato prona me çmim astronomik. Qeveria e favorizoi aq shumë sa që ai brenda 3 vitesh deklaroi një pasuri prej rreth 50 milionë dollarë të fituara në Shqipëri, ndërkohë që nuk i pagoi asnjë obligim tatimor shtetit shqiptar. Këto favore i fitoi sepse ishte mik me njerëz të pushtetshëm, si Berisha dhe Basha, madje vajzën e të parit me Argita Malltezi-Berisha e kishte përfaqësuese ligjore të kompanive të tij fantome, ndërsa kunatin e të dytit administrator të bizneseve të tij.

· Ortakja e Argitës, Flutura Kola, pagoi 1,75 milionë euro nga Qipro për Damir Fazlliç

· Video: Lobi serb pushton Shqiperine

Nuk është problem nëse një biznesmen, qoftë ai edhe serb të ushtrojë veprimtari biznesore në një vend, por kur një qeveri e favorizon duke i ofruar privilegje duke e shkelur ligjin, duke i ofruar tenderë me çmime astronomike, pa asnjë kriter, duke i dhënë mundësi të panumërta për tu pasuruar, ndërkohë që ai del se nuk ka paguar asnjë qindarkë në tatimet shqiptare, atëherë është e natyrshme që të trajtohet me thellë ky fenomen. Kjo është një çështje që ka marrë përmasa politike të paparashikuara. Evoluimi i kësaj historie ka nxjerrë emra zyrtaresh, emra familjarësh të zyrtareve të lartë dhe Kryeministrit. Doli ajo thënia popullore “nga ferra e vogël, del lepuri i madh”.

Ajo që është vërtetë shqetësuese, nuk është as miqësia e Fazlliç me Kryeministrin, as mënyra se si ai fitoi miliona nga kjo miqësi, por ndikimi i tij real në politika të rëndësishme të një shteti demokratik. Mediat fiksuan në një tavolinë pune në Qeveri pamjet kur Berisha shfaqet në krah me Fazlliç, apo pamjet komprometuese që dolën në ndërkohë kur Fazlliç merr pjesë në një mbledhje të Këshillit të Sigurisë Kombëtare ku shihet qartë që ministra e gjeneralë raportojnë para tij. Çfarë kërkon ai aty, cili është statusi i tij, kur është e precizuar qartë në ligj se kush mund të merr pjesë në mbledhjet e Këshillit të Sigurisë Kombëtare. Pra çështja është shumë më e rëndë se ç’mund të paramendohet, serbo-boshnjaku është njeriu i fuqishëm që kontrollon një qeveri, që ka kapur figura të rëndësishme të shtetit, që kontrollon dhe paraprin procese nga më të rëndësishmit. Kjo është më shumë se një skandal, këto mund të jenë probleme aq të mëdha sa që është vështirë të rikuperohen për një kohë të gjatë. Nëse ndalemi pak në retrospektivë do te na kujtohen vitet 1994 - 95 gjatë mandatit të parë të PD-së, kur Berisha e furnizoi me naftë dhe armë shtetin serb, në kohen që ishte nën sanksione të OKB-së, sepse luftonte në Bosnje.

Situatë e paprecedentë në praktikën politike dhe

parlamentare të Shqipërisë

Pas këtyre fakteve Berisha doli dhe tha “Ai është miku im”, duke e mbrojtur me shumë entuziazëm në shumë seanca parlamentare, e duke lëshuar në veprim të gjithë mekanizmat qeveritare e mediat e afërme me të, për të mbrojtur mikun e tij me një background aspak të pëlqyeshëm. Ç’është gjithë kjo nervozë dhe këmbëngulje e tij në mbrojtje të mikut të tij të çuditshëm, i përfshirë në shumë afera korruptive në vendet e rajonit dhe më gjerë, kontrabandist, madje i akuzuar nga drejtësia si njëri nga të dyshuarit në vrasjen e Gjingjiqit, si trafikant dhe nip i Jovica Stanishiqit , ish shef i shërbimit sekret serb (1990-1998) i ndodhur në Hagë si i akuzuar për krime lufte në Bosnjë e Kosovë. Kërkesës së opozitës në parlament për sqarime, Kryeministri u përgjigj me kërcënim, se “s’keni punë me te, ai është miku im, do tu a sjell edhe në parlament po deshët”. Vetëm pak ditë pasi u riaktualizua çështja Fazlliç, ai erdhi në Tiranë me një avion privat, dha një intervistë për njërin nga televizionet kombëtare të afërme me qeverinë dhe iku nën përcjelljen e policisë, pa iu përgjigjur ftesës së Prokurorisë për sqarime.

Kjo shkaktoi edhe një përplasje të fortë në mes të institucioneve. Sepse Prokuroria e Përgjithshme kërkoi ndalimin në aeroport të Fazlliç, ndërkohë që organet e Ministrisë së Punëve të Brendshme nuk iu bindën urdhërit të prokurorisë, çka tregoi edhe njëherë për brishtësinë e institucioneve kryesore të vendit. Me këtë në një farë forme u vërtetua se i gjithë sistemi shtetëror doli në mbrojtje të biznesmenit sekser. Kjo shtyu të reagojë ashpër edhe Departamenti amerikan i shtetit dhe ambasada amerikane në Shqipëri duke dalë fuqishëm në mbrojtje të Prokurores së Përgjithshme, e cila ishte propozuar dhe mbështetur po nga kjo mazhorancë e cila tani po e kryqëzon. Berisha shumë herë ka dëshmuar se nuk mund të bashkëjetojë me institucione të pavarura kushtetuese, ai tenton ti futë nën tutelën e tij të gjitha mekanizmat e pushtetit të pavarur. Pasi pa se pozicioni i tij është shumë i diskutueshëm dhe i kompromentuar dhe Prokuroria e përgjithshme e kishte seriozisht, kur morri vendimin për sekuestrimin e pronave dhe nisjen zyrtare të hetimeve, Berisha kërcënoi Prokurorinë se do të ngrinte një komision Parlamentar për hetimin e Prokurorisë së Përgjithshme, ndërkohë që për “Çështjen Fazlliç” kërkoi hetim ndërkombëtar. Pra, ndodhi një situatë e paprecedentë, në praktikën politike dhe parlamentare të Shqipërisë, që në fakt ishte një iniciativë antiligjore e Kryeministrit!

Dëmi dhe pasojat e këtij skandali të parikuperueshme

për Berishën

Nga faktet dhe argumentet që tani i kemi të njohura rezulton se “Fenomeni Fazlliç” është më tepër se një skandal qeveritar, me tepër se një përplasje pozitë – opozitë dhe me tepër se puna e një njeriu që fiton në mënyrë të pandershme në Shqipëri. Ai është njeri që vendos për punë me interes strategjik për vendin, që furnizohet me informacione tepër sekrete, që ka qasje në të gjitha institucionet qeveritare, që ngarkon dhe shkarkon ministra. Nga disa burime del se ai kishte rol vendimtar në largimin e ish-ministrit të punëve të jashtme Besnik Mustafaj, duke lobuar që në vend të tij të emërojë mikun e tij Lulzim Basha, ministër i paimunitet i transporteve, i cili po hetohet nga prokuroria për keqpërdorimin e dhjetëra milionave euro në ndërtimin e autostradës Durrës-Morinë.

Nëse një njeri që nuk gëzon asnjë pushtet politik ka aq fuqi që të shkarkojë dhe të emërojë ministra në një vend demokratik, atëherë qeveria shqiptare është qeveri e kapur, njerëzit që jetojnë në atë shtet janë të rrezikuar në çdo moment për sigurinë dhe perspektivën e tyre. Është e drejtë që kjo çështje dhe tragjedia e Gërdecit të mos ndahen sepse ka më tepër se një arsye të forte dhe lidhje kauzale që vërteton se të njëjtit akterë kanë dorë në Gërdec, dhe Gërdeci ishte shpërthimi që nxori në shesh njerëz dhe afera korruptive të paimagjinueshme.

· Video: Shpërthimet në Gërdec

Gjatë mocionit për debat që inicioi opozita në Parlament me 3 nëntor, Berisha pasi kishte konsumuar ditë të tëra në mbrojtje të “mikut të tij”, pasi kishte sulmuar prokurorinë që po i prishte “terezinë” biznesmenit, kishte sulmuar opozitën dhe mediat e lira, i gjetur në një kurth të madh dhe nën një presion dhe survejim ndërkombëtar, atë ditë nuk përmendi në asnjë fjalë të vetme Fazlliçin, por (keq)përdori rastin që në një fjalim tepër të gjatë të theksojë gjithë sukseset që kishte arritur qeveria e tij, dhe natyrisht të sulmojë opozitën. Pavarësisht kësaj, dëmi dhe pasojat e këtij skandali për Berishën do të jenë vështirë të rikuperueshme. Tragjedia e Gërdecit dhe “Çështja Fazlliç” do të jenë jo vetëm njollat e zeza por do të jenë dy ndër shumë faktorët që do të shkaktojnë humbjen e të djathtës në zgjedhjet parlamentare të vitit 2009.

· Autori ka kryer studimet master në drejtimin e Marrëdhënieve Ndërkombëtare.

( Lidhjet ilustruese janë siguruar nga moderatori i pashtriku.org )